FALEPUIPUI MO LE 28 MASINA

O le alii e 18 tausaga le matua lea na ta’usala e le faamasinoga maualuga i lona faia o uiga mataga i tamaitai e to’alua e ta’i 14 tausaga le matutua, ua faa falepuipui mo le 28 masina, o se tasi lea o tuutuuga o lana nofovaavaaia e 7 tausaga.

 

Na tutu faatasi le loia a le malo ia Tony Graf ma tina o tamaitai e toalua na aafia e finau i le faamasinoga, ia faasala le alii o James Fitiao mo le umi e 5 tausaga, ona o le matuia o le gaioiga sa ia faia, ae na faaoloolo maau le loia fautua a Fitiao ia Michael White i le faamasinoga, aua ne’i faamamafaina se faasalaga e tuu atu mo le ua molia, a ia ave o ia e auai i ni polokalame e fesoasoani ai i lona mafaufau talavou i aafiaga o ituaiga gaiogia ua mafua ai ona nofosala o i ai lalo o le tulafono.

 

Na tau le mafai ona molimau le tina o Fitiao a’o i luga o le nofoa molimau i le maligi o ona loimata, a’o ia tauanau finagalo o alii faamasino mo se isi avanoa e tatala atu ai lana tama i tua e saili se galuega e fesoasoani ai i le tausiga o le latou aiga e lima vaivai.

 

I le avea ai o Fitiao o le ulumatua a lona tina, na taua ai e le fafine e faapea, e le gata o Fitiao lona lima taumatau, ae ua ia iloa foi lona matua salamo e tusa ai o le solitulafono sa ia faia.

 

Na faatoese Fitiao i le faamasinoga e tusa ai o le solitulafono sa ia faia, sa ia faatoese foi i ona matua ma lona aiga atoaa ina ia faamagalo sona sese.

 

Sa ia faatoese foi i matua ma aiga o tamaitai e toalua na aafia i gaioiga sa ia faia, ina ia alolofa faamagalo o ia, ae na taua e le tina o le isi tamaitai na aafia ina ua maua lona avanoa e molimau ai i luma o le faamasinoga e faapea, e lagona lona mafatia ina ua tula’i mai lenei faalavelave i lana tama, ae sili ai ona faigata ia te ia, ona o le taimi muamua lea faatoa vaai ai i foliga o le tagata na faia uiga mataga i lana tama.

 

I le avea ai o ia ma faiaoga mo le tele o tausaga, o lana galuega o le aoao ma fautua tupulaga i le leaga o le ituaiga olaga lea o lo o ola ai isi tupulaga, ae foliga mai i lona talitonuga, e tele mataupu e faatatau i le sauaina o fanau tamaitai o lo o tutupu ae le o mafai ona ripoti atu i le ofisa o leoleo ma le malo.

 

Na taua e le tina e faapea, na tagi a’o faatoese Fitiao i luma o le faamasinoga, sa maligi fo’i ona loimata ina ua molimau ma loimata le tina o lenei alii talavou ma augani i le faamasinoga mo se avanoa mo lana tama, ae i lana vaai faa faiaoga ia Fitiao ma lana faatoesega, e leai ma se lagona salamo moni o atagia mai ai ia te ia ma ona foliga.

 

Sa ia taua fo’i e faapea, e ui na te lagonaina mafatiaga o lo o feagai ma le tina o Fitiao, ae tatau lava i le faamasinoga ona tuu atu le faasalaga talafeagai i le ua molia, ina ia ona lagonaina ai le matuia o le mea sa ia faia.

 

Na taua e le loia a le malo ia Graf i le faamasinoga e faapea, e ui e le i faatasi atu le tina o le isi tamaitai na aafia i le faamasinoga, ae ua maea ona faaoo atu ia te ia lona mana’o, ina ia faasala Fitiao i le toese i Tafuna mo le 5 tausaga, ina ia aua ai ne’i toe maua se fesootaiga i le va o le ua molia ma lana tama.

 

Na taua foi e le tina i le loia a le malo e faapea, o le tele lava o taimi e vili mai ai Fitiao mai le toese i lana tama, ma o se popolega foi lea ia te ia ona e atagia mai ai e le o i ai se auala e taofia ai le toe fesootai atu o le ua molia i lana tama.

 

E silia i le 20 minute o iloilo e alii faamasino se faasalaga talafeagai mo lenei mataupu, ae maea loa ma fofogaina loa le faaiuga ua i ai.

 

E fa moliaga mamafa ua ta’usala ai e le faamasinoga le ua molia, o ia moliaga e aofia ai moliaga e lua o le faia o uiga mataga faafeusuaiga ma se isi tagata, o se solitulafono e mafai ona faasala ai se tasi i le toese mo le umi e le silia i le 7 tausaga, ma moliaga e lua o le tagofia o itutinosa o se tamaitai e le i faaipoipo i ai, o se solitulafono e mafai ona faasala ai se tasi i le toese mo le umi e le silia i le 5 tausaga.

 

E 7 tausaga na manatu le faamasinoga e loka mo’i ai Fitiao i le toese i Tafuna, peitai ua faamalumalu lona tuliina o lea faasalaga, ae o le a nofovaavaaia o ia mo le 7 tausaga i lalo o poloaiga a le faamasinoga e ao ona usita’i i ai.

 

O ni isi o ia poloaiga e aofia ai le faasa ona ia toe taumafai e faafesootai tamaita’i na aafia i soo se auala, e aofia ai ma le vili mai i le toese i telefoni a tamaitai nei.

 

Ua poloaina foi o ia ina ia lesitala lona igoa i le lisi o i latou ua tausala i le faia o uiga mataga i fanau laiti, ma ia faia se suega i lona tino ina ia iloa ai po o ia tauaveina siama o le faama’i o le HIV.

 

Na taua e Fitiao ina ua fesiligia e le faamasinoga e faapea, o se tasi o tamaitai na aafia i lenei mataupu, o lana uo teine ua leva ona la mafuta, ma o le tele o aso e te’i ai lava i le alu atu o lana uo teine lea i lo latou fale ae le alu i le aoga, ae a fesili atu i ai pe aisea ua le alu ai i le aoga, ae fai mai lana uo teine na alu atu la te eva, ona la eva ai lava lea i totonu o lona potu.

 

O le tamaitai lona lua na aafia e pei ona taua e Fitiao, o le isi tamaitai na alu atu lana uo teine ma avatu, ma o le tamaitai la lea na tago faamalosi o ia la te momoe ae sa musu ai.

 

Na faailoa e Fitiao i le ofisa faanofovaavaaia, sa faapea lava o ia e le faasaina i le tulafono le latou mafutaga ma tamaitai e toalua na aafia.

 

O le faasalaga a Fitiao e 28 masina o le a toese mai ai masina e 6 lea ua o o mai i le taimi lenei ua maea ona ia tuliina i le toese i Tafuna.

Comment Here