O le ali’i lea sa avea ma faiaoga o le kolisi tu’ufa’atasi a le ASCC ia James Barlow, ua fa’asala e le fa’amasinoga e taofia i le toese i Tafuna mo le umi e 24 tausaga, ina ua fa’amaonia e le fa’amasinoga maualuga moliaga e tele sa tu’uaia ai o ia e le malo, e mafua mai i le faalavelave lea na ia faia ai uiga mataga i ni tamaiti se to’atolu e laiti i lalo o le tulafono.

A o le i tu’uina mai le fa’asalaga a le fa’amasinoga mo Barlow, 68 tausaga le matua, na finau le ali’i loia fautua ia Matailupevao Leupolu Jr i le fa’amasinoga mo se fa’asalaga fa’anofovaavaaia o ia, ina ia mafai ai ona auina atu o ia i fafo e fai ai ana talavai mo lona soifua maloloina.

Na taua fo’i e Leupolu e fa’apea, e tele a’afiaga na o o ia Barlow ina ua taofia o ia i le toese ona o le solitulafono sa ia faia, e le gata ua le toe maua lana galuega, ae sa a’afia fo’i lona soifua maloloina ma i’u ina fasi ai o ia e le ali’i pagota o Derek Ropati, lea na semanu e oti ai.

Na finau le ali’i loia e fa’apea, talu ai e le maua i Amerika Samoa ituaiga togafitiga e talafeagai mo le soifua maloloina o Barlow, e agava’a ai ona auina atu o ia i fafo e togafiti ai.

Afai ae fa’aauau pea ona taofia Barlow i le toese i Tafuna, o le a fa’aauau pea ona a’afia lona soifua maloloina, faapea ai ma lona mafaufau, ae afai e toe tipoti o ia i Amerika, o le a saogalemu lona soifua maloloina ma ola lelei o ia, e pei ona taua e Leupolu i lana fa’afinauga.

Ae na taua e le loia a le malo ia Tiffany Oldfield i lana fa’afinauga e fa’apea, na mafua ona loka e leoleo ia Barlow i le po na tula’i mai ai le fa’alavelave, ina ua vaaia le tifa tifa solo o le alu a lana ta’avale i luga o le auala tele, ae maua mulimuli ane ai sa ova lona ‘ona i le po lea, toe maua atu ai ma ni ali’i talavou se to’atolu i totonu o lana ta’avale, e tau fai ‘onana uma fo’i.

O se tasi o vaega na umi se taimi o felafolafoa’i i ai loia ma le ali’i fa’amasino sili, o se vaega o lo o i totonu o le ripoti a le Ofisa Nofova’ava’aia e fa’atatau i solitulafono sa ta’usala ai Barlow i Texas ma Kalefonia.

O lo o taua i le ripoti e fa’apea, e le gata sa ta’usala Barlow i se solitulafono i Texas i le 1989, ae o le tausaga e 1975 na ta’usala ai o ia i le moliaga o le tu fua i le fanua o le isi tagata, peita’i na finau Leupolu e fa’apea, e le i nofo lava Barlow i Texas e pei ona taua i le ripoti, ae o le moliaga fo’i lea na molia ai o ia i kalefonia na solofua e le fa’amasinoga e le i fa’amaonia.

Na finau Oldfield i le fa’amasinoga e fa’apea, e le mama le solitulafono lea ua ta’usala ai Barlow i luma o le fa’amasinoga, ae o se solitulafono e tatau i le fa’amasinoga ona matua iloilo sona fa’asalaga talafeagai, ina ia momoli atu ai le feau i isi fo’i tagata o lo o faia lenei solitulafono, e le manatu mama le fa’amasinoga i ituaiga amioga mataga fa’apenei.

O se tasi o itu na fa’ailoa e le itu a le malo i le fa’amasinoga, o le fa’aauau pea lea ona teena e le ua molia o lana amioga sa fai, e ui o lea ua tu’uina mai le fa’aiuga a le fa’amasinoga e ta’usala ai o ia.

I le fa’afinauga a le itu tete’e e ave ai Barlow i fafo mo ana talavai aemaise ai o lona soifua maloloina, na taua e le itu a le malo e fa’apea, e leai se mea e ave ai fua Barlow e togafiti ai pe afai e le o ma’i o ia.

E to’alua foma’i o lo o galulue i le falemai o le LBJ na molimau i luma o le fa’amasinoga, e faatatau i a’afiaga o lo o maua ai Barlow, e mafua mai i le taimi na taofia ai o ia i le falepuipui, ma fa’asolo mai ai lava i le taimi lea na fa’ao’olima ai se ali’i pagota ia te ia.

O ni isi o a’afiaga na taua e ali’i foma’i o a’afiaga o lona mafaufau aemaise ai lona gasegase ua leva lava ona a’afia ai o ia a o le’i taofia o ia i le toese.

Na toe fa’atepa e le ali’i fa’amasino sili ia Michael Kruse i le taimi na ia fofogaina ai le faasalaga a le faamasinoga, le mafuaaga na ala ai ona taofia e leoleo Barlow i le po na tula’i mai ai le fa’alavelave, ina ua masalomia lona fealua’i ‘ona i luga o le alatele, ae maua ai ma ali’i talavou e toatolu i totonu o lana ta’avale, lea na mulimuli ane latou fa’ailoa i leoleo amioga mataga sa faia e le ua molia fa’asaga ia te i latou.

Na taua e Kruse e fa’apea, o gaioiga mataga sa faia e Barlow i ali’i talavou e to’atolu na a’afia, ua atagia mai ai le i ai o ona lagona tu’inanau i tamaiti laiti, ae maise lava pe a ‘ona.

Na fa’ailoa e ali’i talavou e to’atolu na a’afia i luma o le fa’amasinoga e fa’apea, i le po na tula’i mai ai le fa’alavelave lenei, e le gata na fa’ainu e Barlow i latou i fagupia, ae sa ia fa’amatamata fo’i latou i ata leaga, sosoo ai ma le ave o i latou i totonu o le potu ae fai i ai uiga mataga fa’afeusuaiga.

O ali’i talavou e to’atolu na a’afia i gaioiga a Barlow e aofia ai ali’i e to’alua e ta’i 14 tausaga le matutua, ma le ali’i e to’atasi e 17 tausaga lona matua i le taimi na tula’i mai ai lenei fa’alavelavelave i le 2011.

E fa vaega na vaevae i ai e le fa’amasinoga maualuga le fofogaina o lana fa’asalaga. Sa fa’amaonia e le faamasinoga moliaga e tele faasaga ia Barlow e aofia ai le moliaga o le faia o uiga faa sotoma; faia o gaioiga fa’afeusuaiga, faia o amioga mataga fa’afeusuaiga, ma le ave taavale ‘ona.