Ads by Google Ads by Google

Falepuipui le au gaoi pusa Wahoo

O alii e to’alua ia na ta’usala i le gaoia lea o ni pusa wahoo mai le fale teuoloa a le StarKist i Satala ma faatau atu i ni faleoloa e pulea e ni tagata mai Asia, ua faafalepuipui mo le tai 28 masina, ina ua la ioeina moliaga e pei ona tuuaia ai i laua e le malo.

O le alii o Joe Leota ma Michael Leatigaga ua faasala i le falepuipui, o nisi ia o poloaiga o a la faanofovaavaaia e tai 7 tausaga le umi.

Ua poloaina foi i laua e le faamasinoga la te totogiina salatupe tai $2,000 i le faamasinoga, faasa ona o la toe soliina se tulafono, ae o le a mafai ona tatala i laua i tua e faigaluega, pe afai e maea ona la tuliina le la tai 6 masina muamua o le la faasalaga faafalepuipui i le toese.

Na tau fai faatoese i laua nei i luma o le faamasinoga maualuga i le aso Faraile, ma la talosagaina ai se isi avanoa se tasi mo i laua, la te toe foi atu ai i o la aiga e saili ni galuega e  tausi ai la matua.

Na taua e Leota i le faamasinoga e faapea, o le solitulafono sa ia faia, ua mafua ai ona faalumaina lona aiga aemaise ai o ia. Sa ia talosaga i le faamasinoga e toe fia foi e faauma lana aoga ina ia maua ai sona lumanai lelei mo lona aiga.

Ae fai mai Leatigaga, o le umi lea na taofia ai o ia i le toese, ua mafai ai ona ia aoaoina se lesona taua mo lona olaga, ma ua ia iloaina foi o le falepuipui, e le o se nofoaga lelei lea mo ia.

Na faatoese uma i laua nei i le StarKist Samoa ona o le gaioiga sa laua faia, ua mafua ai ona oo se aafiaga i ana galuega ma ana oloa.

Na talosaga loia a Leota ma Leatigaga i le faamasinoga ina ia faanofovaavaaia i laua nei, ae tuu atu se avanoa e toe fuata’i ai o la olaga mo le lumana’i. Fai mai le loia a Leota o Leslie Cardin e faapea, ua 77 aso talu ona taofia le ua molia i le toese, ma ua ia manatu ua lava ma totoe lea faasalaga mo ia.

Sa ia taua foi, e ui i le faafitauli matuia ua aafia ai Leota, e maualuga lona talitonuga o ia o se tagatanuu lelei mo le atunuu, e tele foi se isi suiga tele mo lona olaga i le lumanai, ae na finau le alii loia ia Mike White na tulai mo Leatigaga e faapea, e leai se isi solitulafono na aafia ai le ua molia ina ua matua o ia, sei vagana ai le mataupu e tasi o le faatupu vevesi i nofoaga faitele na tuuaia ai o ia, a’o laititi o ia i lalo o le tulafono.

Na molimau le uncle a Leatigaga i le faamasinoga ma ia faailoa ai nisi o itu lelei e faatatau i le soifuaga o le ua molia. I le silia ai i le 29 tausaga o tautua lea alii i le Ofisa o le Puipuiga o le Saogalemu a le setete o Hawaii, faapea ai tausaga e 6 talu ona avea o ia ma leoleo o lona nuu o Nuuuli, na taua ai e lea alii le tele o se avanoa e mafai ai ona ia fesoasoani i le toe tapu’eina lea o le olaga o Leatigaga mo le lumanai.

Saunoa le alii faamasino sili ia Michael Kruse e faapea, o Leota ua tausala i moliaga e lua e aofia ai le talepe fale i le tulaga lua ma le moliaga mamafa o le gaoi, ae o Leatigaga ua tausala i le moliaga o lona taliaina lea o ni oloa sa ave faagaoi e se isi tagata.

O le mea na tupu e pei ona saunoa Kruse, i le vaveao o le aso 16 Aokuso 2011, na alu atu ai Leota ma gaoi mai ni pusa wahoo se 102 i totonu o le fale teu oloa a le StarKist Samoa, ona ia ave lea o pusa e 5 i luga o lona fale lea e i tua atu lava o le fale teu oloa lea, ae o pusa e 97 na totoe ai, na sau Leatigaga i lana taavale ona la o lea ua faatau i le faleoloa o le Ocean Stars ma le faleoloa a Pio.

Fai mai le ripoti na saunia e le Ofisa Faanofovaavaaia e faapea, e $1,455 le tupe na maua ina ua tulei e Leatigaga pusa wahoo ia i faleoloa e pei ona ia taua, ona ia tuu lea o le $300 ia Leota ae o le tupe na totoe sa alu uma ma Leatigaga.

Saunoa Kruse, o le auala na fai e le StarKist na mafua ai ona toe maua a latou apa na leiloloa, sa tutuli ana tagata faigaluega e o i faleoloa e siaki ai numera o apa ia ua aveese mai i le faleteu oloa a le kamupani.

Na taamilo tagata faigaluega i faleoloa ma latou maua ai i faleoloa e pei ona taua apa ma numera o loo i ai, ma latou fesiligia ai loa faleoloa nei pe na faapefea ona oo atu apa ia ia te i latou.

Na maua i le masini pueata a se tasi o faleoloa gaioiga uma sa faia i le taimi na faatau atu ai pusa wahoo, atoa ai ma le ata o le tagata na faatinoina lea gaioiga, ma tuuina atu ai loa faamaumauga i le ofisa o leoleo mo suesuega, na faaiu ai loa le suesuega ina ua faila e le malo le tagi i luma o le faamasinoga.

Saunoa Kruse, o Leota ma Leatigaga, e tupuga mai ini aiga e tu lelei, peitai e le o malamalama le faamasinoga i le mafuaaga ua ala ai ona la faia lenei gaioiga, ae o loo la maua uma mea la te manaomia i o la aiga.

Fai mai Kruse, le iloa pe ua maua loa e Leota ma Leatigaga le avanoa la te aveesea mai ai meatotino a le isi tagata, ona la faia loa lea o le solitulafono ua molia ai i laua.

E talitonu le faamasinoga o le solitulafono o le gaoi e pei ona aafia ai tupulaga, ua faatupulaia, ma e ao foi ona saili e le faamasinoga se auala e foia ai lea faafitauli, peitai i le isi itu, e tatau foi ona vaavaai i e o loo aafia ona o nei solitulafono