Ads by Google Ads by Google

Falepuipui le ali’i talepe fale mo le 7 tausaga

O le ali’i  e 20 tausaga le matua lea na ta’usala e le fa’amasinoga i le moliaga o le talepe fale, ua taofia nei i le toese i Tafuna mo le umi e 7 tausaga, ma o lea fa’asalaga fa’atoa tuli pe afai e mae’a ona tuli isi ana fa’asalaga fa’a falepuipui na maua mai i isi fo’i mataupu tau talepe fale ma le gaoi na ta’usala muamua ai o ia e le fa’amasinoga.

 

E ui na matua ta’utino Asofa Titio Jr i luma o le fa’amasinoga ua lagona lona salamo e tusa ai o lana solitulafono sa faia, peita’i i le silasila a le fa’amasinoga i ona fa’amaumauga tau solitulafono, e le o se taimi muamua lea ua ta’usala ai o ia i ituaiga moliaga nei o le talepe fale ma le gaoi.

 

A o le i tuuina atu le faasalaga a le faamasinoga mo Titio Jr, na faatoese le ua molia e tusa ai o lana solitulafono, ma ia talosagaina ai se isi avanoa mo ia se’i fo’i atu ai i lona aiga e saili sana galuega e tausi ai ona matua.

 

Na maua fo’i le avanoa e talosaga ai le tama o le alii ua molia i le faamasinoga, mo se avanoa e tatala atu ai i tua lona atalii e fesoasoani i le tausaga o le aiga.

 

Na taua e le tama e faapea, afai e le o se taimi muamua lea ua silasila mai ai le faamasinoga i lona atalii, e le o se taimi muamua fo’i la lea ua silasila atu ai ali’i fa’amasino ia te ia, aua soo se taimi lava e lau ai le faasalaga a lona atalii, e tula’i ai lava ma talosaga mo se isi avanoa.

 

Na tagi le tama a’o tau fa’aleo lana fa’atoesega i le fa’amasinoga e tusa ai o le solitulafono a lona atalii, ma ia talosagaina ai se isi avanoa se’i toe fo’i atu ai le atalii i le aiga e saili sana galuega, ma fesoasoani atu ia te ia i le tausiga o le aiga.

 

Ina ua fesiligia e le faamasinoga le tama po o faigaluega, na tali o ia, faatoa 7 vaiaso talu ona faigaluega i le kamupani a le Nana’s Company, o le taimi muamua fo’i lea fa’atoa faigaluega ai talu mai le tele o tausaga ua mavae.

 

Saunoa Michael Kruse e fa’apea, o ituaiga olaga nei e ola ai fanau pe afai e le galulue matua, o le molia i solitulafono eseese ma i’u ina nofo sala ai i le falepuipui.

 

E tusa ai o faamaumauga sa tuuina atu e le ofisa nofovaavaaia faasaga i le mataupu a Titio Jr o lo o taua ai e faapea, o Setema 2013 na faasala ai e le faamasinoga le ua molia ina ia taofia i le toese mo le 20 masina, o se tasi lea o tuutuuga o lana nofovaavaaia e 5 tausaga, ina ua ta’usala o ia i moliaga o le talepe fale ma le gaoi.

 

O ia moliaga na afua mai ina ua latou osofaia ma ni isi alii le faleoloa o Sepp’s Store i Tafuna, atoa ai ma se ofisa o le malo i Tafuna i le 2012.

 

Na molia fo’i o ia faatasi ma isi tamaiti talavou i lo latou osofaia o ni taavale se tolu sa paka i le Paka Liona i Tafuna, i le nofoaga sa faia ai faaaliga a le vaega o le Margic Circus of Samoa, ma latou gaoia ai ni mea totino mai totonu o ia ta’avale.

 

O le mataupu lea ua fa’asala ai Titio Jr i le vaiaso na te’a nei, o le mataupu lea na latou osofaia ai ma ni isi alii talavou le faleoloa o le Manu’a Store i le 2012 ma gaoia ai ni oloa mai totonu o le faleoloa, a o lea fa’atoa faila e le malo moliaga fa’asaga ia te ia i le amataga o le tausaga nei.

 

Saunoa Kruse e faapea, ua tele avanoa ua tuu atu e le faamasinoga i lenei alii talavou, ae foliga mai na te le o faaaoga tatauina, e le gata mo ia ae faapena fo’i lona uso matua lea fo’i o lo o tuli sona fa’a salaga faa falepuipui i le taimi nei, ona o moliaga o le talepe fale ma le gaoi na ta’usala ai o ia e le fa’amasinoga.

 

I le faaiuga la a le faamasinoga, o le a taofia Titio Jr i le toese i Tafuna mo le umi e 7 tausaga, ma o lea fa’asalaga, fa’atoa tuli pe mae’a ona tuli lona fa’asalaga fa’a falepuipui o lo o tuliina i le taimi nei, lea e mae’a i le masina o Mati 2015.