Ads by Google Ads by Google

Falepuipui le ali’i talepe fale mo le 10 tausaga

O le ali’i e 25 tausaga le matua lea na ta’usala i lona osofia o ni faleoloa, faleaoga atoa ai ma se fale e nonofo ai se aiga i le tausaga na te’a nei, ua fa’asala e le fa’amasinoga e taofia i le toese i Tafuna mo le umi e 10 tausaga.

 

I le taimi na tuuina atu ai e le afioga i le ali’i fa’amasino sili lagolago ia Lyle L. Richmond lana fa’asalaga mo Gabriel Tinai i le taeao ananafi, na saunoa ai le ali’i fa’amasino e fa’apea, ua le iloa e le fa’amasinoga poo le a se isi tala e toe fai atu i lenei ali’i talavou, ona ua tula’i soo o ia i luma o le fa’amasinoga ona o moliaga o le talepe fale ma le gaoi.

 

E fa mataupu tau solitulafono eseese na tuuaia ai e le malo le ali’i o Tinai, ona o ni fa’alavelave na tutupu i le tausaga na te’a nei, lea na ia talepeina ai ni faleoloa, o le ofisa o se faleaoga, atoa ai ma ni fale e nonofo ai tagata.

 

I lalo o se maliliega na sainia e Tinai i le malo i le masina o Fepuari na te’a nei, na tali ioe ai le ua molia i moliaga ta’itasi mai mataupu e fa na tuuaia ai o ia e le malo, ma o ia moliaga e aofia ai moliaga e lua o le talepe fale i le tulaga muamua, lea e mafai ona faasala ai o ia i le toese amata mai i le 5 tausaga ae le silia ma le 15 tausaga, ma moliaga e lua o le talepe fale i le tulaga lua, lea e mafai ona faasala ai o ia i le toese mo le umi e le silia i le 7 tausaga.

 

Na fa’atoese Tinai i lona aiga, nuu ma le faamasinoga e tusa ai o lana solitulafono sa faia, sa ia faatoese foi i le malo o Amerika Samoa e tusa ai o le solitulafono sa ia faia, ma ia talosagaina ai le faamasinoga mo se isi avanoa mo ia.

 

Sa ia taua e fa’apea, ua ia lagona le leaga o le solitulafono sa ia faia, ua lagona fo’i lona toe fia fo’i i lona aiga, e le o se nofoaga lelei le toese mo ia.

 

Na faailoa e Richmond ia Tinai e faapea, e leai se mea o le a ia fa’atoese ai fua i le malo e fa’amagalo lana solitulafono sa faia, e le o le malo lea na a’afia i lana gaioiga, o tagata lautele o le atunuu, pau le tiute a le malo e fai, o le tula’i lea mo tagatanuu na a’afia ona o lana solitulafono.

 

Na taua e le alii loia ia Douglas Fiaui na tula’i mo Tinai e fa’apea, o le tausaga e 2008 na ta’usala ai fo’i Tinai e le fa’amasinoga i le moliaga o le gaoi, ma ua atagia mai ai le aafia pea o ia i nei ituaiga solitulafono.

 

Na talosaga Fiaui i le faamasinoga mo se faasalaga mama mo Tinai, peitai na finau le loia a le malo ia Tony Graf ina ia fa’asala o ia i le toese i le fa’asalaga fa’a falepuipui pito maualalo e 6 tausaga.

 

“Ua le iloa e le fa’amasinoga po o le a se isi ituaiga tala e fai atu ia oe, ona ua e tula’i so’o i nei ituaiga solitulafono,” o le saunoaga lea a Richmond ia Tinai a’o le i tuuina atu le fa’asalaga a le fa’amasinoga.

 

Mo moliaga e lua o le talepe fale i le tulaga muamua, e ta’i 10 tausaga i le toese i Tafuna i le moliaga e tasi na manatu le fa’amasinoga e faasala ai Tinai, ae mo moliaga e lua o le talepe fale i le tulaga lua, e ta’i 7 tausaga i le toese i le moliaga e tasi sa manatu le fa’amasinoga e fa’asala ai o ia.

 

Ae ua manatu le fa’amasinoga, pau le avanoa o le a tuuina atu mo Tinai, o le a tuli fa’atasi uma nei fa’asalaga i le taimi e tasi, lona uiga e na o le 10 tausaga o le a taofia ai o ia i le toese.