E 20 masina lea ua fa’asala ai e le fa’amasinoga maualuga le ali’i se avea ma pule o le kamupani va’a a le Pacific Shipping Services (PSS) i Amerika Samoa, e nofosala ai i le toese i Tafuna, e mafua mai i le fa’alavelave lea na ia fa’aaoga fa’agaioi ai le silia i le $200,000 o tupe a le kamupani.

O le fa’asalaga fa’a falepuipui ua tu’uina atu ia Lepuiai Allen Mayer, o se tasi lea o tu’utu’uga fa’anofovaavaaia e 7 tausaga.

Ua poloaina fo’i o ia na te toe totogi i le PSS le tupe e silia laititi ma le $180,367 i totonu o le taimi atoa o lana nofova’ava’aia.

O le mataupu lenei na tofu atu i le Ofisa o Leoleo, ina ua faila e se sui o le kamupani a le PSS mai Samoa se tagi fa’asaga ia Lepuiai i le masina o Mati 2014, ina ua masalomia e le kamupani le fa’aaoga fa’agaoi e le ua molia o le silia i le $400,000 o tupe a le kamupani sa tu’uina atu i lalo o lana va’ava’aiga.

O tupe na fa’aaoga e le ua molia, sa ia ao mai i kamupani ma tagata ta’ito’atasi ma teu i totonu o le teugatupe fou sa ia tatalaina i le faletupe a Hawai’i, lea fo’i sa saini ai na o ia i le teugatupe.

Na taua e le loia a Lepuiai ia Tala Uiagalelei le salamo moni o le ua molia e tusa ai o lana solitulafono sa fai, ma ua ia sauni fo’i e toe totogi atu le tupe sa ia fa’aaoga i le kamupani a le PSS.

Na talosaga Uiagalelei i le fa’amasinoga ina ia fa’asala le ua molia i se fa’asalaga nofova’ava’aia, ina ia maua ai le avanoa e galue ai ma toe totogi le tupe, peita’i na finau le loia a le malo ia Tiffany Oldfield ina ia fa’asala o ia i se fa’asalaga fa’a falepuipui.

A o le i tu’uina atu e le fa’amasinoga lana fa’asalaga fa’asaga ia Lepuiai i le vaiaso nei, na maua le avanoa e fa’atoese ai le ua molia i le pulega a le kamupani o le PSS e tusa ai o lana solitulafono sa fai, sa ia fa’atoese fo’i i le fa’amasinoga e tusa ai o lona le usitaia o tulafono a le malo, ma ia talosagaina ai se avanoa e toe fo’i atu ai i lona aiga ma toe totogi le tupe sa ia fa’aaogaina.

O isi na molimau mo le itu a Lepuiai e aofia ai lona faletua, o lana faifeau faapea ai ma lana uo, ma, e le gata sa latou fa’ailoa i le fa’amasinoga itu lelei o le ua molia, ae sa latou talosagaina fo’i le fa’amasinoga ina ia tu’u atu se isi avanoa se tasi mo le ua molia.

Na taua e le faletua a Lepuiai i lana molimau i luma o le fa’amasinoga, lona manaomia tele o lona to’alua e fesoasoani i le tausiga o le la fanau e to’afa, aemaise ai o la tina ua matutua.

Na manino i le molimau a le ali’i faifeau, e le gata o Lepuiai o se tiakono o le latou ekalesia Assembly of God, ae o ia fo’i o se tagata ekalesia e loto alofa ma loto fesoasoani i so o se tasi.

Na taua e le uo a Lepuiai i lana molimau i le fa’amasinoga, lona sauni e saini se konekarate ma Lepuiai e galue ai i lana kamupani fou ua fa’aigoaina o le American Asia Pacific, o se kamupani e gafa ma le fa’atinoina o auaunga tau va’a, ma o lo o faatali i le taimi e talia ai le talosaga mo se laisene pisinisi, atoa ai ma le fa’apipi’iina o le laina telefoni mo le amataina o galuega a le kamupani i lona ofisa i Fagatogo.

E 28 masina masani na manatu le fa’amasinoga e taofia sa’o ai Lepuiai i le toese i Tafuna, peita’i ua manatu e fa’amalumalu lona tuliina o masina e 8, ae ua lava na o masina e 20 na te tuliina, o le a mafai fo’i ona tatala o ia e faigaluega, pe afai e mautu mai fuafuaga uma a le kamupani fou lea ua sauni e ofa atu se galuega mo ia.