O le ali’i lea na faia uiga mataga i si ona lava tei tama’ita’i i totonu o le fale o le la grandmother, e ala i lona tagofia o itutinosa o le tama’itai ina ua fiu e tauanau le tama’ita’i la te o i totonu o le potu, ua poloaina e le fa’amasinoga e taofia i le falepuipui i Tafuna mo le 20 masina, o se tasi lea o tu’utu’uga o lana nofovaavaaia e 5 tausaga.

E fa’amalulu atu i le mamalu o le au faitau, o le a le mafai e le Samoa News ona fa’ailoa le suafa o le ali’i ua fa’a falepuipuiina nei, ona o puipuiga i le ono mafai lea ona silafia atu ai ma le tama’ita’i talavou o lo o a’afia i lenei mataupu.

O le fa’asalaga a le ali’i ua molia na tolopo mai i le aso Gafua na te’a nei, ina ua manino i le ripoti a le Ofisa Nofova’ava’aia le tete’e o le ali’i ua fa’asalaina nei, na te le i faia ni uiga mataga i si ona tei, e ui ua mae’a ona ia tali ioe i luma o le fa’amasinoga sa ia tagofia itutinosa o le tama’ita’i sa a’afia.

A o le i tu’uina mai le fa’asalaga a le fa’amasinoga maualuga ananafi, sa toe fesili le ali’i fa’amasino sili o Michael Kruse i le ali’i ua molia ma lana loia fautua ia Michael White, pe la te toe fia tali atu i le vaega o le ripoti a le Ofisa Nofova’ava’aia lea o lo o taua ai le tete’e a le ali’i ua molia i lana gaioiga sa fai, lea fo’i na tali le ali’i loia ia White ioe.

Na taua e White e fa’apea, na mafua ona fai le ali’i ua molia i le tama’ita’i faigaluega o le Ofisa Nofova’ava’aia na te lei faia le solitulafono e ala i lona tagofia o itutinosa o si ona lava tei, sa lagona lona ma ina ua fesiligia o ia e se tama’ita’i e tusa ai o le mea sa tupu.

Na fa’ailoa e White i le fa’amasinoga e fa’apea, lo o tumau pea i le loto o le ali’i ua molia, lona ioeina o lana gaioiga sa faia, e pei ona ia tali ioe ai i luma o le fa’amasinoga i le amataga o le tausaga nei.

Na talia e le fa’amasinoga le fa’amalamalamaga a le ua molia e tusa ai o le mafua’aga o lona tete’e. Saunoa atili Kruse e fa’apea, o le ali’i ua molia, o se “tagata sa asiasi mai i le teritori”, e mafua mai ona o se ta’amilosaga lakapi sa faia i le atunu’u, ae tula’i mai ai loa le fa’alavelave e pei ona ta’usala ai o ia.

O le mea sa tupu e pei ona saunoa Kruse, o se inugapia sa faia ina ua mae’a se ta’aloga lakapi, na matua vaaia ai le fiafia o le ali’i ua molia ma ni isi o le au lakapi, ma sa matua ova lava le fiafia, ua ova fo’i le tagofia e le ua molia o le ‘ava malosi, ma sauni ai loa e fo’i i le fale ina ua mae’a le latou inugapia i lea po.

Ina ua taunu’u o ia i le fale e pei ona fa’amanino atili e Kruse, sa ia vaaia ai si ona tei teine o lo o matamata mai i le T.V i luma o le potu malolo o le latou fale, ma ua ese ai loa lagona ua tutupu a’e ia te ia ina ua ia vaaia le lalelei o le tama’ita’i, ma ua lagona ai loa lona fia amio leaga, ua mana’o fo’i e faia ni gaioia e fa’amalie ai ona lagona tu’inanau ua totogo a’e i lea taimi.

E tusa ai o le saunoaga a Kruse, sa tauanau e le ali’i ua molia si ona lava tei la te o i totonu potu se’i fa’amalie ai ona lagona tu’inanau, ae ina ua fiu le ua molia e tauanau le tama’ita’i la te o i totonu o le potu ae ua le mafai, na fa’afuase’i ai loa ona alu atu o ia ma tagofia loa itutinosa o le tama’ita’i, peita’i na una’i ese e le tama’ita’i na a’afia o ia ma alu atu ai loa le tama’ita’i na a’afia ua logo lona aiga e tusa ai o le mea ua tupu, ma mafua ai loa ona tofu atu lenei mataupu i le ofisa o leoleo.

I le fa’atoesega a le ali’i ua molia i le vaiaso na te’a nei ina ua fuafua le fofogaina o lana fa’asalaga, e le gata sa ia fa’atoese i le fa’amasinoga ma lona aiga e tusa ai o le mea sa tupu, ae sa ia fa’atoese fo’i i le aiga o le tama’ita’i na a’afia ma ona matua ina ia fa’amagalo o ia.

E 5 tausaga na manatu le fa’amasinoga e fa’asala ai le ua molia i le falepuipui, peita’i ua manatu ali’i fa’amasino e fa’amalumalu le tuliina o lea fa’asalaga, ae o le a nofovaavaaia o ia mo le 5 tausaga i lalo o poloaiga e ao ona ia usita’i i ai.

O ni isi o ia poloaiga e aofia ai lona tuliina o masina e 20 i le falepuipui, a mae’a, ona ia tuua lea o le teritori ae toe fo’i atu i lona atunu’u na malaga mai ai mo le umi e 5 tausaga o lana nofovaavaaia.

Ua poloaina fo’i le tu’uina atu o se kopi o le fa’aiuga a le fa’amasinoga i le ta’itaifono o le Komiti Faafoe a le Ofisa o Femalagaaiga, ma se kopi i le Pulesili o le Ofisa o Femalagaaiga, ina ia latou silafia ai tuutuuga ma le faaiuga a le fa’amasinoga fa’asaga i lenei ali’i.

Na taua e White i le Samoa News e fa’apea, o le ali’i ua fa’asalaina nei, ua mae’a ona lesitala lona igoa i le polokalame o le “Amnesty” a le malo, peita’i ua fa’aleaogaina nei lea avanoa e fa’aleleia ai ona pepa nofomau i le teritori, ona o le solitulafono lea ua ta’usala ai o ia.