Ads by Google Ads by Google

FALEPUIPUI LE ALI’I GAOI TELEFONI

O le alii talavou lea na ia gaioina se telefoni mai totonu o se taxi sa tu i luma o se faleoloa i Pago Pago, ua poloaina e le faamasinoga maualuga na te tuliina masina e 6 i le toese i Tafuna, ae o le a faamalumalu le isi 22 masina sa tatau ona ia tuliina mo tuutuuga o lana faanofovaavaaia e 7 tausaga.

E 28 masina na manatu le faamasinoga e loka moi ai loa le alii o Andrew Peters i le falepuipui, ae talu ai ua talia lana talosaga mo se isi avanoa, ua manatu ai le faamasinoga e tuli na o masina e 6, ae faamalumalu le 22 o loo totoe ai.

Na augani Peters i le faamasinoga mo se isi avanoa se’i fo’i ai e fai sona aiga mo lona aiga. Sa ia taua e faapea, o lona aumau ai i le toese ua ia aoaoina ai se lesona taua mo ia, ua ia iloa foi, o le toese e le o se nofoaga lelei lea mo ia.

O le ta’u faafa e Peters o le fuaitau lea, ‘tu’u mai se isi avanoa se tasi mo a’u,’ i le taimi o lana faatoesega, na mafua ai loa ona fesili le alii faamasino sili ia Michael Kruse ia te ia, pe na te manatua e fia avanoa ua uma ona tuuina atu e le faamasinoga ia te ia.

“E tusa ai ma lau faila lea o loo i o’u luma, e fitu lelei avanoa sa tuu atu e le faamasinoga ia te ia, ina ua e tula’i faafitu i luma o le faamasinoga ona o solitulafono eseese e fitu sa e faia, lona uiga afai e tuu atu le avanoa lenei, o le valu ai lea o avanoa ua tuu atu mo oe,” o le saunoaga lea a Kruse.

Na lagolago e le tamaitai loia fautua ia Leslie Cardin le talosaga a Peters mo se isi avanoa mo ia. Fai mai Cardin, o Peters o se alii talavou faatoa 20 tausaga lona matua, sa nofo ma le aoga e le’i faauu, e manaomia foi se isi fesoasoani mo ia ina ia faauma ai lana aoga.

E ui e lei tetee le loia a le malo o Camil Phillipe i le talosaga e faanofovaavaaia Peters, peitai sa ia finau i le faamasinoga ina ia tuu atu sina faasalaga faafalepuipui mo le ua molia, ina ia aoaoina ai lona mafaufau i le solitulafono sa ia faia.

Fai mai Phillipe, e foliga mai e le o lelei tagata o lo o mafuta atu i ai le ua molia, pe a fuafua i isi fo’i ona tei laiti o lo o faagasolo a latou mataupu tau solitulafono i luma o le faamasinoga faaitumalo.

Saunoa le alii faamasino sili e faapea, e ui i le matuia o le moliaga ua tausala ai le ua molia, peitai o le itu lelei e pei ona taua i faamaumauga a le faamasinoga, ina ua faalogo le ua molia o lo o sue e le ave taxi lana telefoni sa ia gaoiina, na ia toe tuu ai loa le telefoni i le isi ana uo ma lana tala na i ai, e alu e toe faafoi le telefoni i le ave taavale.

Na taua foi e le faamasinoga e faapea, o faamaumauga i le olaga solitulafono o le ua molia, ua atagia mai ai o ia o se tagata faasoesa i le atunuu, peitai e ui i lea tulaga, ua manatu le faamasinoga e talia le talosaga a le ua molia ina ia tuu atu se isi avanoa mo ia.

O le tuutuuga la lea ua tuu atu e le faamasinoga ia Peters, o le a na o le 6 masina na te tuliinai le toese, a maea, ona alu lea e lesitala lona igoa i le kolisi mo le faamae’aina o lana aoga i le polokalame o le GED, ma faauu mai ai ma lana tusi pasi o le vaega 12.

E lua moliaga ua tausala ai Peters, o le gaoi ma le tetee atu i leoleo ao taumafai e pue faapatoga o ia.

E 7 tausaga e faasala ai o ia i le falepuipui mo le gaoi ae tasi mo le tete’e atu i leoleo, ma o ia faasalaga e tuli faatasi, peitai o le a faamalumalu le tuliina ae o la e faanofovaavaaia o ia mo le 7 tausaga i lalo o poloaiga a le faamasinoga.

O nisi o poloaiga e aofia ai le faasa lea ona toe mafuta i ana uo ia o lo o taua i le ripoti a le Ofisa Faanofovaavaaia sa masani ona eva ma tafao ai i le tele o taimi.

Ua faasa foi ona ia toe tuua le fale mai le 8:00 i le po seia oo atu i le 6:00 i le taeao, sei vagana ua la o ma se isi o ona matua. O le sa lea ua tuu atu e le faamasinoga ia Peters, faatoa maea pe a atoa lona 21 tausaga.