Falepuipui le ali’i gaoi mo le 7 tausaga

O le ali’i lea na ia gaoia ni siaki mai ni pisinisi se lua i le 2012 ua ua poloaina e le fa’amasinoga e taofia o ia i le toese i Tafuna mo le umi e 7 tausaga, o le fa’asalaga pito i maualuga lea o lo o fa’atulaga mai e le tulafono mo le moliaga o le gaoi lea na ta’usala ai e le fa’amasinoga maualuga ia Malcolm Dalle.

 

A’o le i tuuina atu le fa’asalaga a le fa’amasinoga mo Dalle, na fa’atoese le ua molia e tusa ai o lana solitulafono sa faia, ma ia ta’utino ai lona matua salamo e tusa ai o lana gaioiga sa faia.

 

E le gata sa ia faatoese i lana ekalesia ma lona aiga e tusa ai o le amioga mataga sa ia faia ua ta’uvalea uma ai i latou, ae sa ia faatoese fo’i i pisinisi e lua na a’afia i lana gaioiga sa faia, ma ia talosagaina ai i latou ina ia fa’amagalo o ia.

 

Na fa’ai’u le fa’atoesega a Dalle i le fa’amasinoga i lona ta’utino i ai o ia ua salamo moni, atoa ai ma lana talosaga mo se isi avanoa se’i toe fo’i atu ai i lona aiga e saili sana galuega e maua ai se tupe mo ia, atoa ai ma le toe taumafai e fa’asa’osa’o vaega o lona olaga ua fa’aletonu ona o lona fa’atamala.

 

Na taua e le tamaitai loia fautua ia Karen Shelly na tula’i mo Dalle, o taimi uma lava la te talanoa ai ma le ua molia i le toese, e faailoa atu ai lava e lenei ali’i ia te ia lona salamo moni e tusa ai o lana solitulafono sa faia, ma ua ia talitonu fo’i i ai, peitai e mana’omia se faasalaga nofovaavaaia e mafai ai ona toe taumafai Dalle e fa’aleleia lona olaga ma fulitua mai le sese sa ia faia.

 

Ae na taua e le loia a le malo o Tony Graf e faapea, o gaioiga sa faia e Dalle ua atagia mai ai le leai o sona agaga salamo mai le olaga gaoi, aua sa molia muamua ai fo’i o ia i ni tausaga ua mavae, a’o lea fo’i ua toe molia ai o ia i nei ituaiga solitulafono.

 

Na finau Graf i le faamasinoga ina ia faasala Dalle i se faasalaga e mafai ai ona ia aoaoina se lesona lelei mo lona olaga, aua e foliga mai i lana gaioiga sa faia i le aso na tulai mai ai le faalavelave, e leai sona popole i mea totino a tagata.

 

O se tasi o itu na taua e Graf e lagolago ai lana faafinauga, faatoa maea lava le nofovaavaaia a Dalle i le ulua’i mataupu na ta’usala ai o ia e le faamasinoga, ae tula’i mai loa ma le mataupu e pei ona ta’usala ai o ia i le taimi nei, ma o iina e ta’u mai ai e le o salamo o ia mai ana amioga o lo o faia.

 

E le i umi se taimi na iloilo ai e ali’i fa’amasino le fa’asalaga a Dalle, ae aga’i mai loa ma fofogaina la latou faaiuga, ina ia taofia le ua molia i le toese mo le umi e 7 tausaga.

 

Saunoa le ali’i fa’amasino sili lagolago ia Lyle L. Richmond i le taimi na ia fofogaina le fa’asalaga a Dalle e faapea, e foliga mai o lo o manaomia e le ua molia se fesoasoani ina ia mafai ai ona taofia le ituaiga olaga o lo o ola ai, ma e talitonu le faamasinoga o le 7 tausaga lea o le a taofia ai o ia, o le a fesoasoani e taofia ai lona toe faia o nei ituaiga solitulafono.

 

E lua mataupu eseese na tuuaia ai e le malo Dalle. O le mataupu muamua e pei ona a’afia ai le kamupani a le Friendly Car Rental, na molia ai Dalle i moliaga mamafa e lua o le gaoi, atoa ai ma moliaga mamafa e lua o le faia o fa’amaumauga tau fa’asese, ma le moliaga o le tete’e atu i leoleo a’o taumafai e pu’e fa’apagota o ia.

 

O ia tuuaiga na afua mai ina ua ia gaoia se pusa sa i ai ni tusi siaki mai totonu o le ofisa o le pisinisi, ona alu lea ua tala le isi siaki i se faleoloa e masani ai, ae o le isi siaki sa ia tala i le faletupe, e ala i lona saini faamalosi o le igoa o le tagata o lo o saini i le tusi tupe.

 

O le mataupu e lua na molia ai Dalle i moliaga mamafa e lua, o lona faia o ni faamaumauga tau faasese atoa ai ma le gaoi. O ia moliaga na afua mai ina ua ia gaoia se siaki mai le kamupani a le Pacific Channel Samoa, e ala i lona tala o le siaki i le aofa’i e $1,500.

 

Na alu Dalle e faatau lana TV ma le Ipad i le Pacific Channel Samoa i le tau e $300, ma pepelo i ai o ia o le a malaga i fafo, ae ina tuua e Dalle le ofisa, sa faailoa e se tagata faigaluega i le pule, o le alii lea o lo o tuuaia i lona gaoia o ni siaki mai le isi pisinisi.

 

O le isi vaiaso na sosoo ai na iloa ai e le pule e $1,500 le tupe ua aveese mai lana teugatupe, ona o le siaki e $1,500 sa tala e se tagata e aunoa ma lana faatanaga, mulimuli ane iloa e le pule o le alii o Dalle na talaina le siaki.

 

O ali’i fa’amasino lagolago ia Mamea Sala Jr ma Muasau Tasina Tofili na lagolago i le ali’i ia Richmond i le iloiloina o le fa’aiuga mo Dalle.

Comment Here