Ads by Google Ads by Google

Falepuipui Katerina Siliga mo le 28 masina

E 28 masina lea ua faasala ai e le faamasinoga maualuga le tamaitai o Katerina Siliga e taofia ai o ia i le toese, ina ua tausala o ia e le faamasinoga i moliaga mamafa e lua o lona faaaoga faasolitulafono o tupe sa tuuina atu ia te ia, atoa ai ma le moliaga mamafa e tasi o le gaoi.

 

O le faasalaga faafalepuipui a Siliga mai le faamasinoga, o se tasi lea o tuutuuga o lana nofovaavaaia e 7 tausaga.

 

E 3 mataupu eseese na ulua’i tuuaia ai Siliga e le faamasinoga, o ia mataupu eseese na molia ai o ia e le malo i moliaga mamafa e tolu o le faaaoga faasolitulafono o tupe sa tuuina atu ia te ia, atoa ai ma le moliaga mamafa e tasi o le gaoi, ae i lalo o le maliliega sa latou sainia ma le malo, na ia tali ioe ai i moliaga e tolu e pei ona faasala ai o ia ae solofua e le faamasinoga le moliaga e tasi sa totoe ai i le pepa o tagi sa faaulu e le malo.

 

A’o le’i tuuina mai le faasalaga a le faamasinoga faasaga ia Siliga, na ulua’i iloilo e alii faamasino faafinauga a loia atoa ai ma le faatoesega a le ua molia e tusa ai o se faasalaga talafeagai mo lenei mataupu.

 

Saunoa le alii faamasino sili ia Michael Kruse e faapea, o le uluai mataupu na tuuaia ai Siliga, na alia’e mai ina ua ia faaaoga faagaoi tupe sa totogi e ni tamaitai se toalua mo le Inisiua a la matua o lo o aumau i Savaii, i le taimi lea ao galue le ua molia i le kamupani Inisiua a le South Sea Insurance.

 

E $240 le ulua’i tupe na piki mai e le ua molia i le aso 25 Novema 2012 mai le isi tamaitai o le auuso o lo o aafia, o le ulua’i tupe foi lea sa totogi mo le Inisiua, ma faaauau ai lava ona piki mai e Siliga tupe mai le tamaitai lea mo le Inisiua e aunoa ma ni lisiti sa ia tuuina atu i ai.

 

Ae na taua e le isi tamaitai o le au uso lea i leoleo, e $120 le tupe ia totogi aga’i ia Siliga, amata mai ia Novema 2011 e oo atu ia Iuni 2012, ae i le masina o Aokuso o le 2012 ina ua faalogo le au uso lenei ua loka e leoleo Siliga ona o tupe a tagata ua ia faaaogaina, na la faafesoota’iina ai loa le Kamupani Inisiua ma fesili i ai i le ‘policy’ a la matua, peitai sa faailoa i ai e se sui a le Kamupani e faapea, e le o i ai se ‘policy’ a o la matua i faila a le Ofisa, atonu ai ua tia’i e le ua molia.

 

Ina ua fesiligia e leoleo Siliga e uiga i le mataupu lea, sa ia ioeina ai lona faaaogaina o tupe sa maua mai mo le ‘policy’ a matua a i laua o lo o aafia.

 

E faapena foi le mataupu lona lua sa tuuaia ai Siliga e le malo, ona o se alii sa ia totogi ia te ia tupe mo le Inisiua a lona tama, peitai ina ua alu atu le alii lea i le Kamupani mo le Inisiua a lona tama ua maliu, sa faailoa i ai e se sui o le Kamupani Inisiua, e le o i ai se igoa o lona tama i faila a le kamupani.

 

E $84.20 na amata totogi e le alii lea i le masina o Me, 2011 mo le Inisiua a lona tama, ae i le masina o Aokuso 2011, na fai atu ai le ua molia ia te ia e toe sii i le $127.78 le tupe e totogi mo le Inisiua a lona tama.

 

Ina ua maliu le tuaa o le alii na aafia ia Me 2011, o iina na faatoa ia iloa ai e leai se ‘policy’ a lona tama o i ai i le kamupani Inisiua, ina ua alu i ai e fesili.

 

O le mataupu lona tolu sa tuuaia ai o ia e le malo, na afua mai ina ua totogi atu e ni tamaitai se toalua ia te ia le $900 mo la K-fares i le kamupani vaalele a le Hawaiina Air, peitai na faaaoga e le ua molia le $200, leai ni K-fares na maua, ae ona toe faafo’i le $700 i tamaitai ia e to’alua.

 

E 7 tausaga i le falepuipui ma le $1,000 i le moliaga e tasi na manatu le faamasinoga e faasala ai Siliga mo moliaga e tolu ua tausala ai o ia, peitai ua finagalo le faamasinoga e faamalumalu le tuliina e le ua molia o lea faasalaga, ae o le a nofovaavaaia o ia mo le 7 tausaga i lalo o poloaiga a le faamasinoga.

 

O ni isi o ia poloaiga e aofia ai lona tuliina o masina e 28 i le toese, atoa ai ma lona toe totogiina o tupe uma sa ia faaaogaina, lea o le a faailoa atu e le Ofisa Faanofovaavaaia ia te ia le aofa’i.

 

O le a mafai foi ona ia talosaga i le faamasinoga mo se avanoa e tatala ai o ia i tua e faigaluega, pe afai e maea ona ia tuliina ulua’i masina e 6 o lana faasalaga, atoa ai foi ma lona faamaonia atu i le faamasinoga ua maua sana galuega tumau.

 

Ua poloaina foi o ia ina ia aua ne’i ona toe solia se tulafono a le malo, ma ia avea o ia ma tagatanuu lelei i soo se taimi.