Ads by Google Ads by Google

Falepuipui i le ave faagaoia o tupe o C.I

E 15 masina lea ua faafalepuipui ai le tina o Tiresa Sua ina ua tausala o ia e le faamasinoga maualuga i moliaga e lima, ona o le faalavelave lea na tulai mai i lona faaaogaina lea o tupe sa totogi atu e tagata mo Pepa Malaga (Certificate of Identity-CI).

O le faasalaga faafalepuipui a Sua, o se tasi lea o poloaiga o lana faasalaga faanofovaavaaia e 5 tausaga, ina ua tuuina mai lana faasalaga i le aso Faraile na tea nei, e le afioga i le alii faamasino sili lagolago ia Lyle L. Richmond.

E le gata ua tuuina atu o ia i le falepuipui mo le 15 masina, ae ua poloaina foi o ia na te totogiina le salatupe e $1,000, faatasi ai ma lona toe totogiina o le tupe sa ia gaoia e $77,365.

Na faatumulia totonu o le potu faamasino maualuga i aiga ma uo a Sua i le taimi na lau ai lana faasalaga.

Ina ua maua lona avanoa, sa ia faatoese ai ma loimata i le faamasinoga ma le malo o Amerika Samoa, e tusa ai o le solitulafono ua tausalaina ai o ia, ma ia talosagaina ai se faamagaloga mo ia.

Sa ia faafetaia lona aiga faapea ai lana ekalesia ona o le latou lagolago ma le fesoasoani ia te ia, a’o faagasolo ai taualumaga o lana faamasinoga mo nei tausaga e tele. Na faaiu lana faatoesega i lona talosagaina o le faamasinoga mo se avanoa mo ia, lea foi na lagolago i ai ma lana loia o Ruth Risch-Fuatagavi.

Na taua e lana loia, o le siosiomaga lea na galuega ai Sua, e tele ina vaaia ai tupe e fefiloi solo ai, ma e tusa ai o suesuega ma faamaumauga sa faia e uiga i lenei mataupu o loo atagia mai ai, sa aofia ai foi le Ta’ita’i a le ua molia i lenei mataupu, ma e i ai lona talitonuga talosia ua i ai se suiga i totonu o le Ofisa lea.

Na finau Fuatagavi i le faamasinoga ina ia faanofovaavaaia Sua, ae alu o ia e faigaluega e saili mai ai se tupe e toe totogi ai le tupe sa ia faaaogaina.

O Sua sa galue i le Ofisa o le Loia Sili i le taimi na tulai mai ai lenei faalavelave, o ia ma isi e toalua sa mai le Ofisa lea sa uluai tuuaia i lenei mataupu, peitai o le taimi nei, e na  o Sua o loo faaauau pea lana mataupu.

E lei toe i ai se isi faafinauga mai le loia Tutoatasi ia Moi Masaniai e uiga i lenei mataupu, sei vagana ai lana faafinauga ua maea ona tuuina atu i le faamasinoga i le taimi na sainia ai le maliliega ma Sua i le tausaga na tea nei.

Na taua e le faamasinoga, e ui i le tele o galuega sa galue ai Sua i le tele o tausaga sa aofia ai tulaga o tupe, o se taimi muamua lea ua ripotia ai lona faaaogaina o ni tupe, ma o ia uiga e le o se amio e masani ai o ia, ui o lea, e talitonu le faamasinoga e tatau lava ona i ai se faasalaga faafalepuipui mo Sua, ona o le tulaga matuia o le solitulafono sa ia faia.

I faamaumauga a le faamasinoga na  taua ai, o tupe na faaaoga e Sua sa faatino ai manaoga a lona aiga ma lana ekalesia.

O moliaga e lima na tausalaina ai le ua molia e aofia ai le moliga e tasi o lona ave faagaoi o ni tupe sa tuuina atu i lalo o lana vaavaaiga, atoa ai ma moliaga e fa o lona taupulepule lea i nisi i le faatinoina o le solitulafono o le gaoi.

E tai 5 tausaga na manatu le faamasinoga e faasala ai Sua i le toese mo le moliaga e tasi, peitai ua manatu le faamasinoga o le a faamalumalu lona faataunuuina o lea faasalaga, ae faanofovaavaaia o ia mo le 5 tausaga i lalo o poloaiga e ao ona ia usitai i ai.

O nisi o ia poloaiga e aofia ai le faasa lea ona ia toe soli se tulafono, faasa foi ona ia taumafai e sola ese ma le atunuu.

Afai ae totogi e Sua le tupe atoa sa ia faaaogaina, o le a toese mai ai e le malo le masina e tasi mo le tai $5,000 o le a ia toe totogiina.

O le masina o Me 2013 o le a toe iloiloina ai e le faamasinoga lenei mataupu, ma vaai poo le a se tulaga ua oo i ai le toe totogiina o le tupe lea ua poloaina le ua molia na te toe totogiina.