E 7 tausaga lea ua fa’asala ai e le fa’amasinoga maualuga le ali’i e 51 tausaga le matua lea na ma’itaga ai le uso fai laititi o lona to’alua, ina ua ta’usala o ia e le fa’amasinoga i moliaga mamafa e lua, le moliaga o le faia o uiga mataga atoa ai ma lona tagofia o itutinosa o se tama’ita’i e le i fa’aipoipo i ai.

Na taua e le afioga i le fa’amasino sili ia Michael Kruse i le taimi na lau ai le fa’asalaga a lenei ali’i, o le ulua’i taimi lenei o le a amata ai ona sui e le fa’amasinoga auala e tuuina atu ai ana fa’asalaga, fa’asaga ia i latou e ta’usala i solitulafono e a’afia ai le faia o uiga mataga fa’asaga i fanau laiti.

Na fa’atoese le ua molia e tusa ai o lana solitulafono sa fai, ma ia talosagaina ai le faamasinoga mo se isi avanoa mo ia, sei fo’i atu ai e saili sana galuega e tausi ai lona to’alua ma lana fanau.

E fa’atele ona taua e le ua molia le upu “o ia ua matua salamo moni” i le taimi na maua ai lona avanoa e fa’atoese ai i le fa’amasinoga.

Na ta’utino le ua molia e fa’apea, e le o se nofoaga lelei le falepuipui mo ia, ma ua ia lagona fo’i le leaga o le solitulafono sa ia faia.

Na fa’ai’u lana fa’amatalaga i lona fa’atoese lea i le tama’ita’i na a’afia aemaise ai lona aiga, ina ia fa’amagalo sona sese i lo latou va. Sa ia fa’atoese fo’i i lona to’alua ma le la fanau e tusa ai o le ta’uvalea o le igoa o le aiga i le gaioiga sa ia faia.

Na talosaga le faletua a le ua molia i le fa’amasinoga, mo se avanoa e toe tatala atu ai i tua lona to’alua, se’i saili se galuega e tausi ai o ia ma le la fanau e to’a 6. Na taua e le tina i luma o le fa’amasinoga e fa’apea, a o le’i tula’i mai lenei fa’alavelave, sa na o lona to’alua sa faigaluega e maua ai se tupe mo le aiga, ae talu ona loka le tama o le aiga i le falepuipui, e lei toe maua lava e ia ma le fanau se tupe.

Saunoa Kruse e fa’apea, o le fa’alavelave lenei na tula’i mai i le taimi ao nonofo fa’atasi le ua molia, o lona to’alua ma le la fanau ma le uso fai laititi e 15 tausaga le matua a lona to’alua i le latou aiga, lea na toe avea mulimuli ane le teineititi lea ma le isi to’alua a lenei ali’i.

O ni isi o gaioiga sa faia e le ali’i lea e pei ona taua e le fa’amasinoga, o lona alu lea i le leva o le po a’o moe le teineititi ma fafagu o ia i luga ae la faiaiga, seia oo ina iloa e le tina ua ma’itaga lana tama, ma ia fanauina ai se pepe teine.

E 7 tausaga lea ua poloaina e le faamasinoga e taofia ai le ua molia i le toese i Tafuna, ina ua ta’usala o ia i le moliaga mamafa o le faia o uiga mataga i se teineititi.

A mae’a ona tuli lana fa’asalaga tuli sa’o lea, ona faatoa ia tuliina lea o le isi faasalaga e 20 masina i le toese, o se tasi lea o tuutuuga o lana nofovaavaaia e 5 tausaga, ina ua ta’usala o ia i le isi moliaga mamafa o lona tagofia lea o itutinosa o se teineititi e le i fa’aipoipo i ai.

A mae’a ona ia tuliina lea fa’asalaga, ona ia tuua loa lea o Amerika Samoa ae toe fo’i atu i lona atunuu na sau ai, ma le tuutuuga ua fa’asa ona ia toe taumafai e ulufale mai i Amerika Samoa.

O lana salatupe e ta’i $10,000 lea ua fa’amalumalu e le fa’amasinoga (ta’i $5,000 i le moliaga e tasi), o le a fa’amalumalu lona totogiina, ae faatoa totogi pe afai e maua o ia ua toe ulufale mai i le teritori.

Ua lapaia fo’i e Kruse le tagata na te sponsor ina le ua molia ina ia mafai ai ona toe ulufale mai i le atunuu, o ia tonu lea o le a gafa ma le totogiina o le salatupe lenei.