Na manino i le molimau a le tofa ia Falema’o Pili i luma o le komiti o le Sailiga o le Tamaoaiga a le Maota o Sui i le vaiaso na te’a nei, e le o i ai se tupe i totonu o le Feagaiga o le Tapa’a lea na sainia e le malo ma le Initeria, e faatupe mai ai le pili tupe e $2 miliona a le maota o sui, e fesoasoani ai i gaioiga a le falema’i o le LBJ ona o faafitauli tau tupe o loo latou fetaia’i i le taimi nei.

E oo foi i le Senate sa faaulu foi i le vaiaso na tea nei sa latou tulafono taufaaofi, e faasoasoa atu ai le aofaiga e $2 miliona e tuu atu mo le LBJ.

Saunoa Falema’o i luma o le komiti, e le o i ai se tupe i totonu o le Feagaiga o le Tapa’a sa osia e le malo ma le Initeria, sei vagana ai le aitalafu e tusa ma le $13 miliona lea e oo mai i le tausaga 2010 o loo totoe e lei maea ona totogi e le malo.

I le folasaga a le susuga Falema’o, sa maua ai le avanoa na te faamalamalamaina ai i luma o le komiti le mafuaaga o le aitalafu o loo i ai nei, atoa ai ma le mafuaaga ua leai ai se tupe e pei ona manatu le Fono o loo i ai le tupe o loo maua mai i le Feagaiga o le Tapa’a.

Saunoa Falema’o e faapea, i le tausaga e 1999, na pasia ai e le Konekeresi le faia lea o se Feagaiga aitalafu i le va o le Malo o Amerika Samoa (MAS) ma le Matagaluega o le Initeria (MI), ma nono mai ai loa e le MAS le tupe e $18.6 mai le MI.

O lea aitalafu e lei tuuina uma mai e le MI i le taimi e tasi ia MAS, ae na auaua’i lona totogiina mai, fuafua lea i le taimi e tulai mai ai se manaoga mo le totogiina lea e le MAS o ana pili ma aitalafu.

E tusa ai ma aiaiga uma o le aitalafu lenei na mafai ona maua e Falema’o mai faamaumauga a le TOFR o loo taua ai, e tatau ona oo atu i le 2017 ua maea ona toe totogi le aitalafu i le MI, mai tupe o le Feagaiga o le Tapa’a e pei ona pasia e le Fono.

E $2.3 miliona o loo totogi atu e le MAS i le MI i tausaga taitasi mo lenei aitalafu.

“Talu mai le tausaga tupe 2010, e tusa ma le $13 miliona le aitalafu a MAS o loo totoe e lei totogiina atu i le MI, o le fesili la ua tulai mai pe o i ai se tupe i totonu o le Feagaiga o le Tapa’a e pei ona taua, o le tali e leai,” o le saunoaga lea a Falema’o.

Saunoa le afioga i le alii faipule ia Faimealelei Allen, o le fesili ua tulai mai, poo a aitalafu ma pili a le malo sa totogi i lenei aitalafu, aua o mea uma ia e tatau ona faamalamalama i le atunuu, ae na saunoa le afioga ia Vailiuama Steve Leasiolagi, afai o le 1999 na amata mai ai le nonogatupe lenei, ma amata ai foi ona totogi mai le aitalafu, e i ai lona talitonuga ua leva ona tatau ona maea ona totogi le aitalafu.

E lei umi lava se taimi o le iloiloga ae maea, ma ua taoto le fautuaga a le komiti i le tofa Falema’o, mo le tuuina mai o se ripoti mai le Initeria e uiga i le aitalafu lea a le malo, ina ia mafai ai ona manino le maota i le tulaga tonu o loo taoto ai le isi lea aitalafu a le malo.