TU’UA’IA E LE AIGA LE MANU’A O LE ATALII 22 TAUSAGA I LEOLEO

O lo o faagasolo i le taimi nei se suesuega faapitoa a le Matagaluega o Leoleo i lalo o le faatautaiga a le Vaega o Leoleo Su’esu’e (CID), i se mataupu na tula’i mai i Mapusagafou i le masina o Mati lea o lo o masalomia na manu’a ai se alii talavou e 22 tausaga le matua.

Na faamaonia mai e le Komesina le tumau o le Matagaluega o Leoleo ia Leseiau Laumoli i le Samoa News e faapea, “O lo o faagasolo i le taimi nei suesuega mo mataupu tau solitulafono faapea ai ma le suesuega faalotoifale (internal investigation) a le ofisa o leoleo faasaga i alii leoleo o lo o aafia i lenei mataupu”.

E talitonu le Samoa News e toafa leoleo o lo o fesiligia e le vaega a le CID e faatatau i lenei mataupu, o i latou fo’i ia sa i ai i le taimi o le faalavelave lea na tulai mai i le aso 27 o Mati, 2013 ina ua maua e le Ofisa o Leoleo i Tafuna se telefoni i se vevesi o lo o tupu i Mapusagafou,.

Na taua e se molimau i le Samoa News e faapea, ina ua taunuu le taavale a leoleo i le nofoaga na ripotia mai ai le vevesi, sa faatonuina ai alii leoleo le na manu’a e aua ne’i tamo’e, peitai na le’i usita’i lea alii ma fai ai loa a latou tuliga ma leoleo e toatolu ae tasi le alii leoleo na mulimuli atu i le tuliga i totonu o le taavale.

Na taua e se molimau i le Samoa News e faapea, o le alii na aafia na lavea lona vae i le apa o le fale a le isi aiga, ina ua a’e ai i luga ao faia a latou tuliga ma leoleo ma o le matuia tele o le manu’a o le vae o lenei alii na faanatinati atu ai o ia i le po lava lea i le falema’i ma taofia ai mo le fa aso.

Ae na taua e se sui o le aiga i le Samoa News e faapea, o foliga o le manu’a e atagia mai ai sa oso ai i luga le pa’u o se taavale, ae le o se manu’a na mafua mai ona o se lavea i se apa o se fale ma na faila e le tina o le na manu’a sana tagi i le Ofisa o Leoleo i Tafuna e tusa ai o le faalavelave na aafia ai lana tama.

E tusa ai o se faamatalaga ua maua e le Samoa News i lenei mataupu o lo o taua ai e faapea, ina ua taunuu le ripoti i le Ofisa o Leoleo i Tafuna, sa faia le faaiuga ina ia tuu sa’o mai i le Vaega o le ‘Traffic Division’ i le Ofisa autu o leoleo i Fagatogo le mataupu mo le suesueina.

Na faamaonia mai e le taitai o lea Vaega, o Capt. Muagututia John Cendrowski i le Samoa News e faapea, i le faaiuga o le latou suesuega, na faaoo atu ai loa lenei mataupu i le vaega a le CID ona e le o se mataupu tau i le latou vaega lea mataupu, ae foliga mai o se mataupu e aafia ai ni faiga faasolitulafono.

E ui i le tulaga matuia o lo o si’omia ai lenei mataupu peitai e le’i finagalo le tina o le alii sa manu’a e talanoa mai i le Samoa News, ina ua taumafai e fesiligia sona finagalo ona sa ia taua lona popole tele i le saogalemu o lona aiga pe afai ae faia sana faamatalaga faalaua’itele faasaga i leoleo o lo o aafia.