O le vaa fagota lea na taofia i le teritori i le masina o Iulai na tea nei, ua maea nei ona faila e le feterale ni moliaga se fitu faasaga i le kamupani o loo pulea lea vaa fagota i Niu Sila, ona o tuuaiga i lo latou soliina lea o tulafono tau i le puipuiga o ogasami mai le lafoai i ai o lapisi.Afai ae faamaonia moliaga ua faia faasaga i le kamupani a le Sanford Ltd, e ono oo atu i le $500,000 le sala tupe mo le moliaga e tasi, poo le faaluaina foi lea o lea aofaiga, e pei ona taua mai i faamaumauga a le Matagaluega o Faamasinoga a le malo tele, ma o lea salatupe e ono atu i le $24 miliona.Na faamaonia mai e Lt. Steven Caskey lea o loo faauluulu i ai le Ofisa o le U.S Coast Guard i Amerika Samoa e faapea, o le vaa fagota o le San Nikunau lea na taofia ina ua masalomia i le aafia ai o le ogasami mai le suauu o le vaa, na mafai ona faamaonia ina ua faia i ai se suesuega.I faamaumauga a le feterale e uiga i lenei mataupu, o loo taua ai le sasaa e nisi o le auvaa o kalone suauu i le sami i taimi o a latou fagota, talu mai le tausaga e 2007.O loo faapea foi ona tuuaia e le feterale le kamupani a le Sanford Ltd i lo latou faatamala lea e fai ni a latou faamaumauga i luga o le vaa, atoa ai ma le tuuina atu lea o ni faamaumauga sese i le vaega suesue.I se pepa o faamatalaga na tuuina mai i le kamupani mai Niu Sila, o loo taua ai lo latou mauaina lea o le kopi o lenei tagi tauala atu i le latou loia, ma ua amata a latou suesuega e tusa ai o lenei mataupu, e pei ona faamaonia mai e Eric Barrat le faatonu a le kamupani.Na taua e Barratt lo latou sauni e teena uma tuuaiga ua faia faasaga i le kamupani, e tusa ai o le faalavelave o loo tuuaia na tulai mai ia Iulai 2011.Na taua e Barratt, o se tasi o a latou matafaioi o le mautinoa lea e saogalemu gaioiga uma o loo latou faia i luga o le sami, latou te puiopui foi i ogasami, latou te le mafai ona faia ni ituaiga gaioiga faapea.Sa ia taua foi, talu mai le 10 tausaga talu ai, o loo tumau pea le tausia lelei e le kamupani o le siosiomaga mai ana faamaumauga, ina ia mautinoa e le aafia ogasami.O le tausaga 2011 na tauaaoina ai e le kamupani se faaiuga taualoa mai le ACCA (Global Association of Chartered Accountants) i totonu lava o Niu Sila, ina ua latou tuuina atu se ripoti maeaea i tulaga o atinae.E tasi le vaiaso talu ona maea le failaina e le loia a le kamupani o Jennifer Joneson o se tagi i luma o le faamasinoga maualuga, faasaga i le Teutupe a le malo ia Magalei Logovii, ma le Pule o le Ofisa o Tiute ia Glen Lefiti, e tusa ai o le taofiga o le vaa i le masina o Iulai, ae faila loa e le feterale a latou moliaga faasaga i le kamupani.I le tagi na faaulu e Joneson o loo taua ai, o se faatanaga mai le malo ina ia faataga ona tuua e le vaa le teritori na tuuina atu, lea na mafai ai loa ona faaauau le malaga a le vaa.O loo finau le kamupani latou te lei soliina se tulafono a le malo o Amerika Samoa, lea ua mafua ai fua ona faia lenei tagi faasaga i le vaa fagota.faaliliu Ausage Fausia