O le Helikopa na fe’avea’i ai tagata turisi lea na pa’u e tulata i le a’ai e le momoe i le lalolagi o Las Vegas na pa’u ma ua maliliu ai se ulugali’i fou Initia fa’ato’a mae’a ona fa’aipoipo, o nisi o lana pasese na ‘ave i lea malaga. Ua fa’ailoa mai, ua matua faila fa’alelei lava e matua o lenei ulugali’i fou se latou tagi e fa’asaga i le Kamupani Helikopa lea.

O le ali’i talavou Lovish Bhanot, e na’o le 28 tausaga o lona olaga, ma lona to’alua fa’ato’a mae’a ona fa’aipoipo o Anupama Bhola, 26 tausaga o le soifuaga, ua fa’ailoa mai, “O se mea sili lea ona tiga ma matuitui ua o’o i olaga o aiga na lua, ma ua matua le fiafia ai lava i latou.” O se latou lea tala ua failaina fa’atasi nei ma latou fa’asea fa’aletulafono i le Clark County District Court i Nevada e fa’asaga i le Kamupani Helikopa.

O le tagi lenei ua fa’ato’a failaina, ina ua mae’a ona fa’ailo mai le ulua’i lipoti ua mae’a tu’ufa’atasia mai le afuaga o le pa’u o lenei Helikopa, lea sa fa’afoea e le Sundance Helicopters. O le tala mai, ua fa’afuase’ia lava ona se ‘ese mai le lele a le Helikopa mai le alava’a masani ai, ma ua vave lava ona pa’u ai loa i le aso Lulu na te’a nei.

Ua fa’ailoa mai fo’i e leai ma se tasi o le auva’a ma le pasese o sao mai lea fa’alavelave. E to’afa lava i latou sa i luga o lea Helikopa, ae o le latou malaga lea, e maimoaina ai e i latou le Hoover Dam, o se nofoaga e fa’ailo lava o se Mata’aga fo’i a Las Vegas i ona atumauga e tulata lava i le a’ai sili ona le momoe o Las Vegas.

O Bhanot o le fa’atonu lea o le Lyca Investment Ltd, o se kamupani e fa’atautaia lava e lona aiga, peita’i, o le faletua o lea ali’i faiava, o se tama’ita’i e Tautu i Va’alele a le Air India. “O lo ua matua fa’anoanoa lava nei aiga na lua, e le o faigofie lava ia i latou le vave tele ona maliliu o i la’ua nei,

O le tu’ua’iga o le Sundance Helicopters lea ua fa’ailo nei i le fa’amasinoga, ua fa’apea ai, “O lo ua le faia le tiute o Sudance Helikopa, o le va’aia lelei ma fa’aaoga mai se helikopa ua mae’a siakia lelei e fa’ataunu’u ai nei faigamalaga Maimoaga i nei nofoaga iloga o le setete.”

Ua fa’ailoa fo’i i fa’amaumauga i luga o le Helikopa lea i le taimi na pa’u ai, ona ua le mafai ona fa’afoea e le ali’i pailate. Ua fa’ailoa mai e leai ma se fa’aletonu o le tau i lea taimi na tupu ai lea fa’aletonu, ma e pau lava lea se mafuaga e tatau ona fa’amatala auiliilia mea nei ua fa’amauina na tutupu ae pa’u loa ma le Helikopa.

Peita’i, i le taimi tonu na tupu ai le fa’alavelave ua fa’afuase’i lava ona a’e le helikopa lea i le 4,100futuMSL ma toe liliu e tusa o le 90tikeri i le itu i sisifo, ma ua toe aga’i mai i lalo i le 3,300futu ma lele ai lava mo le isi 20 sekone se’ia o’o ai lava ina le toe taofiofia lava le lele aga’i i lalo ma pa’u atu ai lava.

E le o se ulua’i fa’alavelave lea ua a’afia ai Helikopa a lea lava Kamupani, ae o lo’o fa’asoloatoa a latou fa’asalalauga i luga o le latou Uepesite e fa’apea, “E sili lo latou tomai ma o se kamupani Helikopa pito i Nevada.

O Setema 2003 na maliliu ai fo’i se pailate ma lana auva’a ma le pasese fo’i ona sa pa’u ai fo’i le latou Helikopa a’o fa’aifo mai i le Mauga o Canyon e tusa o le tasi ma le afa maila i le itu i sasa’e o le Grand Canyon WesvtAirport i Arizona.

Source: Associated Press