O le ali’i Samoa fai pisinisi lea na molia e le malo feterale i ni nai masina e le i mamao atu i lona faia o ni amioga tau fa’asese e ave fa’agaoi ai se vaega tupe tele mai le Faili Pu a se Aoga Maualuga i Missouri, ua toe molia nei fo’i o ia i lona faia o ni amioga tau fa’asese ma ave fa’agaoi ai se vaega tupe tele mai le Faili Pu a se aoga maualuga i Arkansas.

Na auina e aoga ia e lua ni vaega tupe i le ali’i o Calliope R. Saaga, o se ali’i e fai sana pisinisi fai pepa malaga i va’alele, e totogi ai pasese mo malaga a Faili Pu mo Hawaii i le tausaga e 2012, ae fa’aaoga ai e Saaga tupe mo ia lava e pei ona tu’uaia ai o ia e le fetarale.

Na taua e le feterale e fa’apea, e silia i le afa miliona le tupe atoa na gaoi e Saaga, lea o lo o aumau nei i Utah i le nofoaga o lo o i ai le isi ana pisinisi.

O le aso 7 Me na faila ai e le feterale le mataupu fou fa’asaga ia Saaga, o le aso lava fo’i lea na faila ai le mataupu muamua fa’asaga ia te ia i Missouri.

O lo o taua i fa’amaumauga a le feterale e fa’apea, e fa’atolu ona auina atu e le aoga maualuga a Southside High School Marching Band i Arkansas tupe ia Saaga, talu mai le va o le tausaga e 2011 ma le 2012, i le aofaiga atoa o le tupe e $272,500.

O le tupe sa totogi e le aoga ia Saaga mo pasese o le au malaga, na maua mai i sailiga tupe sa faia e le asosi o matua, faapea ai ma tupe na totogi e tamaiti aoga ma latou matua.

Na taua e le loia a le malo ia Conner Eldridge e fa’apea, o le mataupu lenei o lo o aafia ai faiga tau faasese e faaaoga ai tupe sa totogi e fanau aoga ma matua e faatupe ai le latou malaga faapitoa mo Hawaii.

Na taua e le loia le matuia o le gaioiga na tula’i mai, i le taumafai lea o se tasi e faia ni auala e aveese mai ai tupe sa tigaina fanau aoga ma matua e saili mo le malaga, ma, o le a finau malosi fo’i le malo e faamasino le mataupu lenei seia oo ina fa’amalieina le tulafono.

Ae na taua e le sui o le vaega a le FBI ia David Fesch e fa’apea, o le mata’utia o lenei mataupu e le gata ua a’afia ai le aoga ae faapea fo’i ma nai fanau atoa ai ma latou matua.

O le aso 9 Iuni na tula’i ai Saaga i luma o le faamasinoga feterale ma ia teena tuuaiga uma fa’asaga ia te ia, ma o lo o faaauau pea tuutuuga o lo o tatala ai o ia i tua ina ua ia totogi le tupe e $10,000 na fa’atulaga e tatala ai o ia i tua.

fa’aliliu Ausage Fausia