Ua fa’aalia e le Ofisa o le Amapasa a Amerika i Samoa le siitia o le latou auaunaga mo tagata Samoa e fia talosaga ni visa e malaga ai i le Iunaite Setete o Amerika, ina ua mafai ona maua se tasi o a latou polokalame fou, e ala i se fesoasoani tupe ua faamatuu mai e le fetarale.

Na taua e le sui o le Ofisa o le Amapasa ia Peter Ganser i se pepa o faamatalaga sa tuuina mai i tusitala e faapea, o le suiga fou lea ua maea ona toe siitia i ai le tautua a le ofisa i Samoa, e ala i se fesoasoani tupe e US$100,000, ua matua faigofie ai galuega uma o loo manaomia mo le faagaioiina o talosaga ma faatalatalanoaga mo visa malaga.

O le auala o lo o faagasolo ai faatalatalanoaga mo visa malaga i Amerika, e tai lua masina ma valaau faatalatalanoaga mo le umi e na o le tasi le vaiaso e fa’agasolo ai.

“O le lagona fiafia ia te a’u ma le aufaigaluega atoa, ina ua mafai ona matou mauaina lenei fesoasoani maualuga, ua mafai ai ona fa’aleleia vaega sa moomia le fa’aleleia, atoa ai ma le si’itia i luga o le auaunaga a le Ofisa mo tagata Samoa”, o le saunoaga lea a Ganser.

O ni isi o auaunaga sa le mafai ona fa’atinoina i le Ofisa i Samoa ao lea ua mafai ona fa’atinoina i le taimi nei, o le lolomiina lea o visa i luga o tusi folau o tagata malaga.

Na taua e Ganser e fa’apea, o se tasi o masini ua mafai ona latou fa’aaogaina i le taimi nei, o le masini lea e lolomi ai le visa i luga o le tusi folau, o se auaunaga sa le mafai ona fa’atinoina i tausaga ua mavae, aua sa ave tusi folau a tagata ua fa’amanuiaina a latou talosaga mo ni visa i Niu Sila e lolomi mai ai a latou visa.

O le toatele o tagata o lo o masani ona auto va’a atu i Apia mo le faia o a latou talosaga mo visa, o tagata e malaga atu i Amerika Samoa nei.

Na taua e Ganser i le faaiuga o lana saunoaga, o le faa faigofie ona faatinoina o le tautua fou a le Ofisa i Samoa, ua mafai ai fo’i ona faa faigofie i nai tagata talosaga, i le vave lea o le taimi e nonofo ai mo a latou faatalatalanoaga ae toe fo’i i aiga.

E 10 tausaga le umi o le visa tafao e malaga ai le tagata i Amerika e asiasi i aiga, pe afai ae talia lana talosaga, ae na o le 6 masina le umi e fa’ataga ona nofo ai ona toe foi mai lea i lona aiga, e pei ona taua i ni isi o fa’amaumauga a le Ofisa o le Amapasa i Samoa i luga o fesootaiga tau initaneti.