Ads by Google Ads by Google

Faigata ona manino se ‘au Manumalo

Pe afai o la outou ‘au sa siamupini i le tausaga ua te’a i lenei liki, ua matua faigata ona e toe fa’ataututuina le osofa’i mai o ‘au volipolo i le liki lava lenei o le tausaga nei. Ua iloga mai le fita o le ta’amilosaga o lo’o fa’atautaia nei.

O le ta’amilosaga o fa’atautaia nei, e saili ai ‘au volipolo e sui le tatou malo i le Ta’amilosaga Volipolo Fa’avaomalo i le tatou Sisigafu’a Aperila 2012. O lea liki e fai ma sao o le tatou Asosi Volipolo i le fa’amanatuina o le tatou sisigafu’a i lenei tausaga, ma ua mae’a fa’asalalauina atu, o lo’o ua mae’a fa’aulu mai ‘au e lima mai Samoa, Au Volipolo mai Tonga, ma le ‘au Volipolo mai Ausetalia i lea lava liki. Aua le fa’avaivai i tatou i lo tatou taumafai atili, ina ia maua se ‘ai o Amerika Samoa i le tatou lava sisigafu’a.

O ta’aloga sa fa’atautaia i le aso To’ona’i na te’a nei, ua mae’a fa’ao’o mai i’uga, ma ua fa’ailoa mai ai le fetauiga i le va o ‘au e ono a tama’ita’i, na amatalia ai le aso o ta’aloga volipolo mata’utia i le Fale Ta’alo lava o Tafuna High School.

O le fetauiga a le Taumafai ma Amouli 1 na to’ilalo ai Amouli ia Taumafai Girls. O le ‘au malosi a le Filemu na fetaui ma Snow Spikers ma ua manumalo ai le Snow Spikers mai Aoloau. O le ‘au a Amouli 2 na fetaui ma Amouli 1 ma manumalo ai tama’ita’i matutua lea o lo’o tula’i mo Amouli 2 i le latou lea fetauiga.

I le ta’aloga i le va o le All Natural ma Taumafai na toe manumalo ai le Taumafai i le All Natural. O le ta’aloga a Amouli 2 ma le Filemu Girls na manumalo ai Amouli 2 ae o le ta’aloga i le va o Taumafai ma Snow Spikers na malo ai Snow Spikers mai Aoloau.

O ta’aloga i le ta’amilosaga a ‘au a Ali’i Ana fetaui ai le Fiafia ma le Tap Boys, na manumalo ai le Fiafia Boys. O le fetauiga i le va o Amouli ma le Snow Spikers i le “Ali’i A” na manumalo ai  le Snow Spikers. A’o le Ulafala na fetaui ma Filemu ma manumalo ai le Filemu.

Puna Boys na ta’a’alo ma Tap Boys, ma na manumalo lelei le Tap Boys. O le ‘au a Amouli sa fetaui ma le Ava Boys ma manumalo ai le Ava Boys i lea ta’aloga. O le ta’aloga nasoso’o ai le Fiafia ma le Puna Boys, ma o se mea mata’ina le fa’ato’a pala’ai ai lea o le Fiafia Boys i lea fetaugia mata’ina. Ulafala mai Futiga na fetaui ma Tap Boys ma sa manumalo fo’i le Tap Boys i le latou lea ta’aloga. O le ta’aloga i le va o le Au Volipolo mai Amouli ma le Taumafai Boys mai Pava’ia’i, na suipi ai fo’i le Taumafai, ae o le fetauiga mulimuli o le afiafi i le va o Vaitele Boys ma le All Sports na manumalo ai le All Sports.

Na fa’aauau mai ta’aloga a le liki lea i le afiafi ole aso Lua na te’a nei, ma muamua ai tatala malae le ‘au a Amouli Girls 2  ma Taumafai Girls mai Pavaiai, ma sa manumalo ai Amouli Girls 2. O le ta’aloga o le va o le Filemu Girls ma le ‘au malosi a le All Natural na manumalo ai tama’ita’i lanu samasama a le Filemu.

O le ta’aloga i le va o le Snow mai Aoloau ma le Amouli 1, na manumalo ai le Snow. I le vaega a le U19 na mua’i fetaui ai Ulafala ma le Filemu, ua manumalo ai le Filemu i le vaega o tama e i lalo mai o le 19 tausaga le matutua.

O le a toe soso’o atu le tala o nei ta’aloga i le tatou lomiga o le aso To’ona’i a sau, ma ua fa’ailoa mai fo’i, o le a toe maua uma lava le avanoa e ta’itasi i le ta’amilosaga o le Pa’u ma Nofo i le aso To’ona’i a sau. O lona uiga, sau e te ta’alo ma lou mautinoa, ua fili i le afi le ta’amilosaga lea, o le pa’u lava o lau ‘au ona o le fa’atamala, ua malolo loa fo’i.

Peita’i i le ta’amilosaga a Tama’ita’i, ua fa’ailoa mai ua tulaga muamua ai le Amouli Girls 2 e le’i i ai se faia’ina. I le liki a Ali’i A ua fa’ailoa mai ai le pool A ua manumalo ai le Taumafai e le’i i ai se Faiaina, ae o le Pool B sa tutusa ai le Fiafia ma le Sideout e taitasi o la faia’ina, su’e loa i seti ma manumalo ai loa le Sideout, o le vaega lea o le a sailia ai le tulaga muamua ma le lua o le ta’amilosaga.

O le a toe talatala atu fo’i nisi taumafaiga i le tatou lomiga o le aso To’ona’i nei.