Faiaoga a'au mo tagata iai mana'oga fa'apitoa & isi uma

O lo ua o'o mai i Amerika Samoa le tama'ita'i e maua ona tusi pasi fa'apitoa i le avea ai ma Faia'oga A'au mo so'o se tasi e afua mai fanau iti e ta'itasi le tausaga le matutua, se'ia o'o i tagata matutua lava ua mana'omia ona iloa a'au, ae fa'apea fo'i ma i latou "e i ai mana'oga fa'apitoa, pe o afaina tumau o latou tino ma le mafaufau.

 

O Patti Greene Johnson, o se tasi na soifua a'e i Michigan, ae lima ona tausaga, si'itia mai le galuega a lona tama i Pearl Harbor i le vaega au, ma aumai ai lava o ia, ua le toe o ese ai ma Hawaii. O lona uiga, ua mafai ona saunia Patti, o ia o le tama'ita'i mai le atumotu o Hawaii.

 

O ona tomai uma fo'i o lo'o ua agavaa ai o ia i galuega na tautua ai ma o lo'o fa'aauau pea ona aoga atu ai i nisi, sa a'otauina ai lava o ia i le setete o Hawaii mai lona talavou.

 

O lo'o iinei le tama'ita'i o Patti ma lona to'alua, Capt. Jim Johnson lea e fa'aigoaina lava e ia o "Capt. Balckie!" lea sa la'ua folau mai i le la'ua va'a faila, ma ua taula nei i le Marina i Fagatogo.

 

Na fa'ailoa mai e Johnson, o le tele o lona tomai sa galue ai o ia i le Matagaluega o Paka ma Malaeta'alo i le setete o Hawaii mo le 20+ tausaga. Peita'i e tusa o le 40+ tausaga e galuega feso'ota'i lava o ia ma le sami po'o vaitafe, ona o ia e fiafia tele i le a'au, alo paopao, kayak ma le Maulu.

 

E laisene uma lava le tama'ita'i nei i ona agava'a ua lisia i luga, ma o le lelei lea o lona o'o mai, ua mafai ona ia faia a'oa'oga a'au mo le mamalu lautele ae maise fanau iti pe talavou, e le'o iloa a'au.

 

"O i tatou o tagata o atumotu, e tele na'ua le vaega o le tatou olaga e ola feso'ota'i lelei ma le moana po'o vaitafe, peita'i e maofa nisi o setete tutotonu o Amerika pe afai o le a fesiligia oe pe ete iloa a'au ae o le a e tali atu e leai,” o sana tala 'ata lea.

 

Lona lua o sona taofi fa'aalia, "E matua lava ma totoe le taimi e mafai ai e le tagata o le atumotu ona fa'aaoga tatau e o'o ai e ta'ele i le sami po'o se vaitafe, e le mamao le sami mai o tatou fanua o alaala ai. Ae ona o le le mana'o lava i ai o le tagata Samoa. O le malosi fo'i lea e maua e tino o tagata Samoa, e matua lava ma totoe mo le a'au mamao." O le isi lea manatu e fa'aosofia ai le naunau e a'au o le to'atele.”

 

I le Marina taula va'a faila i Fagatogo e to'aono nisi o fanau talavou, mai le 9 tausaga se'ia o'o i le 17 ua mafai ona fa'aaoga tatau lo latou taimi e Patti e ao ai le latou a'au i le Vaita'ale o le faletalimalo o le Sadies by the Sea i Utulei.

 

"I le taimi na matou fetaui ai, o lo'o togitogi ma'a lenei vasega o le fanau i le sami, e foliga mai o fia maua se i'a e ave i le fale, ae togi i le ma'a. Ua ou iloa nei e matua masau lava tauau o tamaiti samoa i le togitogi."

 

Ona toe fa'aauau lea o lana fa'amatalaga ma fai mai, "Peita'i na ou fesiligia po'o a latou mea e fai, ae pe lelei latou a'au. Tali le fanau, e leiloa a'au, tali le tasi e lelei lana a'au ae le mamao, tali le tasi, masalo e tatau ona la'ua tutu'u e iloa ai pe a mai lana a'au."

 

"O nei vaega uma, e i ai e matua leiloa a'au, o nisi e iloa a'au ae le sa'o le ala o a'au ai, ae o le isi e matua leiloa lava a'au. O lea la ua tofu maua e i latou sa'u meaalofa mo i latou nei, ia iloa lelei a'au mamao ma le malosi,” o se tala fiafia lea a Patti.

 

I le taimi nei ua faia lava e ia a'oa'oga o le a'au i so'o se tasi, ae fa'asolosolo i le matutua ana vasega, aua e tatau ona a'oa'oina fa'atasi tagata e tupulaga. Ua tutusa lelei le malosi o le manava. O lea o lo ua ofo ane le Swimming Pool po'o le vai ta'ele a le Faletalimalo o le Sadies i Utulei ina ia faia ai nei a'oga. E amata i le itula e 1:30 i le aoauli mo le fanau iti e na'o le 1 - 5 tausaga le matutua, ona soso'o lea ma le a'oga fa'apitoa mo le fanau e le o atoatoa le malosi o le tino po'o le mafaufau, ona fa'ato'a avanoa lea mo le vasega feololo ma le vasega matutua e fa'ai'u i ai.

 

"O le galuega ma le taleni lenei, e le tatau ona matamuli ai se tasi, aua a tutupu fa'alavelave fa'afuase'i i luga o va'a femalaga'i, po'o va'alele fo'i i nisi taimi, a le lava ofu fa'aola, ia mafai ona e fa'asaoina lou soifua i luga o le sami."

 

O lo ua auai fa'atasi le tama'ita'i o Sany Scanlan ma nisi fo'i o matua ma aiga, ina ia fesoasoani malosi ia Patti Greene ina ia mafai ona tu'ufa'atasia vasega a le fanau iti ma le fanau fa'apitoa.

 

E tusa ai ma se manatu fa'apitoa o se tasi o tina matua, "Ou te fa'afetai, sa ou le iloa e amata ona a'oa'o se tamaititi i le 1 le tausaga e a'au, ae o mai lava teine sasa'o latou fa'ailoa mai, amata vave e o'o ane le tamaititi i le matua pe talavou fou, ua tele lona tomai e mafai ona tauva ai i ta'aloga e faia i le vai po'o luga o le sami, ae maise e mafai fo'i ona fa'asaoina lona soifua i ni fa'alavelave tutupu e ono a'afia ai i luga o le sami."

Comment Here