Ads by Google Ads by Google

Faia ni fesuiaiga i taitai o ni isi o matagaluega a le malo

LOLO:  Ou te le mana’o e faaauau pea faiga pi’opi’o na tula’i mai nofoaiga ua mavae

 

O le faaiuga ua faia i ni isi o Matagaluega a le malo i le fesuiai o tofiga, ua faia i lalo o se talitonuga malosi ia taofia ai le toe tula’i mai o faiga pi’opi’o ma fa’aalatua sa faia i le taimi o le nofoaiga ua mavae atu.

 

O le saunoaga lea a le afioga i le Kovana Sili ia Lolo Matalasi Moliga, ina ua fesiligia e le Samoa News i se feiloaiga ma tusitala i le aso ananafi e faatatau i lenei mataupu.

 

“Sa ou fautuaina Faatonusili o Matagaluega a le malo o lo o aafia i tulaga nei, ina ia saili auala e mafai ai ona aveese mai i latou nei mai tofiga o lo o latou tauaveina, ina ia aua ai ne’i o latou toe maua le malosi e toe faaauau ai mea pi’opi’o ma faiga fa’aalaatua sa latou faia i le nofoaiga ua mavae atu,” o le saunoaga lea a le tofa Lolo.

 

Pe a ma le lima Matagaluega a le malo na taua e le alii kovana o lo o aofia i fesuiaiga e pei ona faia, e aofia ai le Matagaluega o Tagata Faigaluega a le malo, Matagaluega o le Soifua Maloloina, ma le Matagaluega o le Puipuiga o le Vaomatua ma le Gataifale.

 

O ni isi o faasea e aofia ai le fesiligia o le toe faa faigaluegaina o le tina ia Eseneiaso Liu i le Matagaluega o Tagata Faigaluega a le malo i le tulaga o le sui faatonusili, ae o lea na litaea mai le matagaluega i le tausaga ua tuana’i, i le maea o le 45 tausaga o lana auaunaga i le malo.

 

Na aumai e le alii kovana le mataupu a le faletua o Eseneiaso e fai ma faataitaiga o lana saunoaga ma ia taua ai e faapea, sa ia fautuaina le matagaluega o le ofisa o lo o galue ai Eseneiaso ina ia fai ni fesuiaiga e aveese mai ai le tofi sui faatonusili mai le o lo o ia tauaveina lea tofiga ona o mafuaaga e pei ona ia taua.

 

“O se faataitaiga o la’u faamatalaga, o le sui faatonusili o le ofisa lea na aafia i le taliaina o siitaga o totogi i le taimi o le nofoaiga tuai ua mavae atu, e ala i le sii mai o totogi o ni isi o tagata mai le $38,000 e aga’i atu i le $48,000 e aunoa ma se faatanaga e faatinoina ai nei gaioiga,” o le saunoaga lea a le alii kovana e aunoa ma lona faailoaina o le suafa o le sui faatonusili o le matagaluega o lo o faatatau i ai lana saunoaga.

 

O le faaiuga a le kovana e faia suiga e pei ona amata faagasolo i le taimi nei, e le gata na faavae mai i luga o le ripoti a le ‘Transition Team’ lana faaiuga ua faia nei, ae o isi fo’i tulaga le sa’o ma le pi’opi’o nei sa ia vaai tino lava i ai.

 

“O ituaiga mataupu nei e pei o le faia o gaioiga pi’opi’o i auala e le tusa ai ma ala o le tulafono, ou te le mana’o e toe faaauau ona tulai mai, aua o le taimi lava e toe tupu mai ai, lona uiga ua toe faaauau le faatusa o le nofoaiga ua mavae atu,” o le isi lea saunoaga a le alii kovana.

 

O i latou ua aafia i fesuiaiga ua faia e le faigamalo, e ui o le a aveesea mai le tulaga o le sui faatonusili, ae o le a tumau pea ona galulue i totonu o matagaluega o lo o galulue ai i le taimi nei, pau le itu na faamaonia mai e Lolo, e le gata o le a aveesea tofiga sa latou umia ae o le a toe faafoi i tua a latou totogi i le tulaga tuai sa i ai, lea e faitau afe le maualuga o le a toe faafoi ai i tua a latou totogi.