O le ali'i e 15 tausaga mai Matu’u lea na ia gaoia se pusa pia mai totonu o se fale'oloa i Pago Pago, ua taofia nei i le to'ese i Tafuna ma le fa'amoemoe e fai tausaga fou ai, se ia aulia le aso Faraile o le vaiaso fou ona toe iloilo lea e le fa'amasinoga fa'aitumalo lana mata'upu.

O le taeao ananafi na faila ai e le malo le moliaga o le gaoi fa'asaga i lenei ali'i, ma o se solitulafono e ono mafai ona loka ai o ia i le to'ese mo le umi e le silia ma le 7 tausaga, pe fa'asala foi i se salatupe e le silia ma le $5,000, pe 'afai ae fa'amaonia e le fa'amasinoga le moliaga ua tu'uaia ai o ia.

I fa'amaumauga a le fa'amasinoga na ta'ua ai, o lenei fa'alavelave na tula'i mai i le taimi o le po a’o tatala le fale'oloa, ae na fa'atoa iloa e le pule o le fale'oloa ina ua ia toe matamata i le mea pu’eata mo fa'atauga i le po lava lea, ae va'aia ai loa le gaoioiga sa faia e lenei ali'i ma ia fa'afeso’ota’i ai loa le ofisa o leoleo i le po lava lea.

Na aga’i le ua molia i totonu o le fale'oloa ma le fa'amoemoe e fai sana faa'tau. Na autilo solo le ua molia e leai ma se isi o iloaina atu o ia, o lea na ia si'iina ai loa lea o se pusa pia ma ui atu i le isi faitoto’a o lo o i le autafa o le fale'oloa sa matala, ma aga’i atu ai loa i se tama’i fale o lo o fa'atali mai ai ana uo ma latou inu loa.

E le’i umi ona fai le inuga ae taunu'u leoleo i le fale'oloa, ma fa'aauau atu ai lava i tua i le tama’i fale lea o lo o faia ai le inuga, ma maua atu ai na o le ali'i e 15 tausaga na gaoia le pusa pia ae ua sosola ese uma ana uo.

Na fesili le leoleo i le ula lea po o fea le pusa pia, ae na tali le ali'i lea ua uma na tia’i. Sa feula e le ula lea le masini ma iloa ai ua 'ova pasene fa'atulagaina e tatau ona gata ai le malosi o le 'ava malosi i le tino o le tagata, o le mafua'aga lea na taofia ai loa o ia e leoleo.

Na ta'ua e le loia a le malo o lo o gafa ma mata'upu a fanau laiti o Terri Bullinger, o se tasi lenei o solitulafono ua televave lona fa'atupula'ia i le taimi nei e a'afia ai tupulaga laiti, o le tagofia lea o le 'ava malosi.

Sa ia ta'ua, i le silia i le to'a 200 o mata'upu e uiga i fanau laiti na mafai ona o'o atu i luma o le fa'amasinoga i lenei tausaga, o le to'atele lava o i latou nei e tu'ua'ia i le tagofia o le 'ava malosi 'atoa ai ma le fa'atupu vevesi i nofoaga faitele, aemaise lava i totonu o 'aoga.

ìO lo o matou taumafai pea ma le fa'amasinoga 'atoa ai ma ni Isi o Ofisa o le malo e fa'atulaga ni polokalame atoa ai ma ni 'auala e fesoasoani ai i fanau laiti nei, ina ia taofia le toe a'afia i solitulafono 'ese'ese,î o le saunoaga lea a Bullinger.

Sa ia ta'ua foi, o ni isi o fanau nei e le o se taimi muamua lenei ua a'afia ai i latou i solitulafono.

O lo o taofia pea i le falepuipui o tamaiti laiti i Tafuna le ula lea e fa'atali ai le aso Lulu lea ua fa'atulaga e toe vala'auina ai lana mata'upu i luma o le fa'amasinoga fa'aitumalo, o le aso foi lea o le a iloa tonu ai le tulaga o lana mata'upu, pe fa'aauau pea ona taofia o ia i le to'ese pe tatala i lalo o le va'ava'aiga a ona matua.