Fagogo: Tama o le CIA

E toe faatalofa atu i le aufaitau i lenei vaiaso, malo le onosai malo foi le galulue, ae alo mai loa o le toe sosooina lenei o le tatou tala faasolo i le tama o Eteuati le CIA faapitoa mo lenei vaiaso.

Sa mafaufau lava le teine o Seta i le tala a le tama o Eteuati e alofa ia te ia, ae foliga mai e ese uiga nei e faaali atu ia te ia, ma e foliga mai o se tagata ua taumafai e alu ese ma ia. Ao la talanoa i totonu o le ofisa a le tama, na tei ina ua tatagi le telefoni a Eteuati ae faalogo atu, o lana failautusi o loo telefoni atu fai mai, “Boss, e i ai le tamaloa lea na sau ananafi e fia feiloai ia te oe, ae o le mea e leaga ai, e le o i ai sona igoa i le lisi o tagata o loo o mai e asi le ofisa ma fia feiloai ia te oe, ae o le a sou manatu, e faataga pea e alu atu e vaai oe,?”

E lei tali le tama i le telefoni a lana failautusi, ae o le taimi lea sa ia fai atu ai ia Sera, e sili ona alu sei la toe talanoa i se taimi ona o lea ua pisi mai lana galuega. E lei tali Sera i se tala ae ua usitai ma savali ese atu ma le ofisa a le tama ma lona faanaunauga, e toe fia talanoa ma toe fia vaai ia Eteuati.

E lei umi ona tea atu Sera ae tuitui atu loa ma le tagata lea sa sau ananafi e fia feiloai i le tama, ma le tatala atu o le faitotoa, o le Lutena a le tama o Eteuati, ona feiloai atu ai loa lea o le tama i lana Lutena, ae tei i le fai atu o le Lutena ia te ia, “O lea ua maua mai le faatonuga mai le ofisa ulu, toe lua vaiaso tapuni le polokalame lea na mafua ai ona auina mai oe e saili, o lena ua e iloa lelei Eteuati le mafuaaga na ala ai ona taofi oe e le vaega a le CIA aua e te toe alu ese ma latou.” o le talanoa atu lea a le Lutena i le tama i totonu o lona ofisa.

“Faamoemoe e tatau ona maea le lua vaiaso lenei ua maua uma faamaumauga o loo fia maua e le CIA e uiga i kamupani nei,” o le talanoa atu lea a le Lutena i le tama, peitai na tali atu Eteuati e faapea, “ma te fia faaipoipo ma la’u uo o Sera i le isi tolu vaiaso o loo lumanai nei i Sikotilani, ae afai e maea la’u suesuega, ona tuuina atu lea o le ripoti ia te outou, faitalia outou poo ai e o mai e pu’e faapagota atu tagata o le a aafia i le ripoti lea,” o le tala lea a Eteuati na ata ai lana Lutena.

Pau le mea na manao i ai le Lutena, e tatau ona fai muamua suesuega sei faamaonia pe moni tuuaiga faasaga i le tama o Sera pe leai, ona faatoa fai lea o le faaipoipogoa, faatasi ai ma lana tala ia Eteuati, “aua ete popole i se mea e tasi, e le taitai o’u faailoaina lou igoa i le taimi e mapuna a’e ai le ripoti lenei.”

Comment Here