[Malo le faitau, malo fo’i le onosa’i, ae alo mai loa o le toe soso’oina lenei o le tatou tala fa’asolo, lea na gata mai i le vaiaso na te’a nei i le taimi lea ua oso ai le tama o Fatu i totonu o le fale ina ua faatoa taunuu mai lana malaga mai Salafai.]

O le le mautonu o le mafaufau o Fatu na ia kikiina ai le faitotoa o le fale ma ulufale faamalosi ai i totonu i lona fia mautinoa o le vaaiga lea ua ia vaaia nei. Na ona faataalise atu lava o le tama i totonu o le potu malolo e le o i ai le toeaina o Pulusi, tamoe atu loa i le potu o loo loka ona ia taumafai lea e tuitui peitai o loo loka mai totonu. Ua le mautonu lagona o le tama ona ua ese lava lona mafaufau i le taimi nei, e foliga mai e i ai se mea o loo tupu i le toeaina. Ua savali atu Fatu ua tuu lana umu ma lana faatau na aumai i luga o le laulau, ona saofai ifo loa lea i luga o le nofoa  ma faasolo ona mafaufauga poo fea se aiga e ono saili i ai le tamaloa o Pulusi lea ua leai ma le fale, ao faasolo ona mafaufauga, na tei ina ua valaau mai se tagata i lona leo, na tepa atu Fatu ma ia iloa ai le fafine o Lumepa lea o loo tu mai i fafo o le faitotoa.

“Malo le malaga manuia, na o oe na e sau?” o le fesili lea a Lumepa ma ia tatala le faitotoa ona savali atu lea ma saofai i le isi nofoa i totonu o le fale, “Ioe, na o a’u na sau la’u malaga, o Pa’uline o loo faamuli ma nai o’u tei ma tapena latou ofu mo le aoga, tou te lei iloa mai Pulusi talu ona ma o i Savaii, ou te taunuu mai e leai se isi i le fale,” o le fesili lea a Fatu ae na tali le fafine o Lumepa latou te lei iloaina mai lava se Pulusi i le fale, sei vagana ai le pasi sa tu lava e lei fealua’i, ona ia vaaia lea o ni tamaloloa se toalua na mai ma ave le pasi. O Lumepa, e nonofo lisi foi ma lona aiga i le fanua lea e tuai ma le fanua o loo lisi e Pulusi ma Pauline i Palisi, o le uo lava lea a le ulugalii o Pulusi ma lona toalua mo le tele o tausaga, ma ua pei lava foi le latou mafutaga o se mafutaga a se aiga, e fetufaai a latou meaai, e fesoasoani le isi i le tasi pe a manaomia le fesoasoani, e faatuatuaina foi e le isi aiga le isi aiga i soo se taimi e manaomia ai ni fesoasoani tau tupe poo isi lava manaoga tau i le aiga.

O le iite o lagona o Fatu i le ono i ai lea o se mea ua tupu i si ona tama fai o Pulusi, na ia manatu ai o le a vane le faitotoa  o le potu ina ia mautinoa e leai se mea o tupu i totonu o le fale, peitai o ni lagona faateia ma le le mautonu na vaaia e le tama ina ua ia tatalaina le potu ma ia vaaia ai Pulusi o loo taoto i luga o lona moega, ua maliu ma ua malo foi lona tino e foliga mai ua fai si umi talu ona maliu. Talofa e i le faamoemoega o le aiga sa tuuina atu e Pauline i tauau o Pulusi, ao lenei ua foliga mai ua moni ai le upu a le atunuu, ua saluvale le lau taamu a Aopo.