[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua nofonofo to'atasi ai le tamaloa o Iose i luma o le umukuka ma fa'asolosolo ona mafaufauga i le la mafutaga ma Pulusi, ao fa'atalitali le ta'avale falema'i mo le auina atu o le tino maliu o si tamaloa i le falemai.]

“Kalofa e isi o’u uso o Pulusi, ai lava ga ma’i ga o ia i loga fale a’o legei lava e le o iloa aku oga mafakiaga ....”e tautalatala to'atasi lava Iose i luga o le ogala'au lea o lo o ta'atia i luma o le umukuka lea o lo o nofonofo ai ma solo ona loimata, ma taula’i lana va'ai i le tamaitiiti o Fatu lea o lo o nofo fa'aseuapa mai i le faitotoa o le fale e pei o se tagata ua leai se faamoemoe, e na o le sioa ae ua le gagana mai. Na vave lava ona tau le mafaufau o Iose i le afiafi muamua lava lea na fa'atoa o mai ai Pulusi ma si ona atali'i o Fatu ma le la fa'atau o le ato talo ma le pepa mamoe e fai ai la latou tausiga o le afiafi, lea fo'i na so'o uma ai aiga o lo latou tua'oi o fa'amatala i ai e le toeaina lona atali'i lea ua la o mai, atoa ai ma lona mimita i le tulaga lelei o Fatu i le a'oga i Avele, e le gata e atamai ae o se tamaitiiti fo'i e lelei i ta'aloga. Ua pei lava o se ata tifaga fa'asolo i le mafaufau o Iose mea uma sa tutupu i lena afiafi, ma ua pei ai lava o se pese malie i le fa'alogologo a le tamaloa ao fa'asoa mai e ona mafaufauga vaega taua o le mafutaga ma Pulusi.

“Iose! Iose! .. va'ai aku le ka'avale falema’i gale ua emoemo mai e fa'asigo aku i ai le  'auala e ui mai ai ....” o le augani atu lea a le fafine o Lumepa le to'alua o Iose ma savali atu lava ua po po le tua o Fatu ma fa'alototele atu i ai ona o le maliu o si ona tama. “Faku, aua e ke fa'agoagoa, e le o se sese o oe ma lou kiga ua mafua ai legei fa'alavelave, akogu lava ua maliu si ou kama i se ma’i ae le’i iloa mai e kakou, ae ogosa’i ma sema se kaimi e ke kalagoa ai i lou kiga i Amouka e fa'ailoa i ai le mea ua kupu, ua e iloa,?” o le talanoa atu lea a Lumepa ia Fatu, ae o le tamaitiiti i lea taimi e le gagana mai lava i se tala sei vagana ai le luelue o lona ulu.

Na tei ai lava ua pisi fa'atopetope leoleo ma tagata faigaluega a le falema'i i luma o le fale o le aiga i lea afiafi, i le momoliina atu lea o le tino maliu o si tamaloa o Pulusi i le falema’i, ao leoleo ua amata a latou su'esu'ega masani e aofia ai le fesilisili solo i aiga tua'oi atoa ai ma le tamaitiiti o Fatu mo le aoina mai lea o ni fa'amatalaga e uiga i le fa'alavelave. Na tau fai lolofi uma atu Iose ma lana fanau e o'o i lona to'alua i le si'iina mai lea o le tino o le tamaloa mai totonu o lona potu e avatu i le ta'avale a le falema’i, ina ua uma ona tu'u atu lona tino maliu i le ta'avale, sa toe aga'i atu loa foma'i i le falema'i mo  le fa'aauauina o la latou tiute, ae ua nonofo ai na o leoleo e to'a 4 mo su'esu'ega. Na uma vave lava le tagi a le tamaitiiti o Fatu ina ua ia va'aia se leoleo ulupo'o tino maualuga lava ma lana pupula saua ua savali sa’o atu lava i le mea lea o lo o nofo mai ai, ma lana api o lo o u'u i lona lima.