Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua uma ona fa’ailoa atu ai e le tamaitiiti i lona tina, sa fai i le leoleo sa inupia lona tama ma Pulusi i le po o le vaiaso lava lea na maua atu ai le tino maliu o Pulusi i totonu o lona fale.]

E tu fua le fafine o Lumepa i le taimi lea ae o lona mafaufau ua toe ‘ave i tua i le po lea na inupia ai Iose ma Pulusi i tua o le umukuka, lea na fa’ai’u puta ina ua fufusu ma togi ai e Iose Pulusi i le ma’a ma tau ai i lona papatua, ona toe savali atu fo’i lea o Iose ma laupapa ma toe sasa ai le manava o le tamaloa. Ta’ilo fo’i i le saoasaoa o le va’alele i le taimi e sauni ai o le a lele pe maua le saoasaoa o mafaufauga o le fafine o Lumepa lea ua fa’asolo nei i se ‘auala e mafai ai ona maua se la feso’ota’iga vave ma Iose i Savai’i, Manatua fo’i le ‘aufaitau, o lea ua motu fa’afuasei le talanoaga a le tamaitiiti ma le ali’i leoleo o Meki ina ua le toe mafai e le tamaitiiti ona toe fai se isi tala ina ua tagi, ma ‘avea ai loa ma itu na ita ai le fafine o Lumepa i le ali’i leoleo ma sau ai loa toso ‘ese atu lana tama.

E le’i umi ona te’a atu le ta’avale a leoleo ae toe va’aia e Lumepa ua toe fotua’i mai, ma o le taimi la lea, ua to’atele leoleo ua o mai ai fa’atasi ai ma se leoleo tama’ita’i. “Talofa ia te oe le tina,” o le fa’atalofa atu lea a le tama’ita’i leoleo ia Lumepa, ona tu’u mai fo’i lea o le lima o Lumepa ma fa’afeiloa’i ai le leoleo. “Fa’amata e i ai se ‘auala e mafai ai ona matou maua se feso’ota’iga ma Iose mo sina mata’upu o lo o mana’omia ai o ia i la matou ofisa,?” o le fesili atu lea a le leoleo ia Lumepa, a’o le’i tali mai le fafine, na te’i i le toe fa’apea atu o le tama’ita’i leoleo, “Oi, o Veli lo’u igoa, o a’u lea e fesoasoani i le ali’i leoleo ia Meki i le su’esu’eina o le mata’upu na mafua ai le maliu o Pulusi.” Na umi se taimi o fai talanoaga a Lumepa ma Veli i fafo o le fa’apaologa o le fale, mo le tau fa’amautuina o se ‘auala e mafai ai ona feso’ota’i ia Iose, ma, e fo’i nai leoleo i le afiafi lea e lei mautu lava se tonu, peita’i o le tu’utu’uga lea ua fai nei, afai e uma le vaiaso lea e le’i toe fo’i mai Iose, o le a o leoleo e sa’ili mai o ia i Savai’i.

Na ona fuli mai lava o le keli o le ta’avale a leoleo, a’apa atu loa ma Lumepa i le telefoni ma vili le fale komiti o le nu’u lea o lo o i ai Iose, ma ta’u i ai le poloa’i i le fafine o lo o leoleo ina ia fa’ao’o atu le fe’au i le aiga o Mekala, e fai atu ia Iose e vili vave mai i lona aiga i Palisi e i ai le mata’upu taua lea e fia talanoa atu ai lona to’alua ia te ia. E le’i atoa se itula talu ona mae’a le telefoni a Lumepa ae tatagi loa ma la latou telefoni, ona oso atu loa lea o le fafine ua tali, ma le fa’alogo atu o le leo o si ana manamea o Iose, ona ia fa’amatalaina ai loa lea i ai o leoleo ia na o atu i le fale, fa’atasi ai ma le ali’i leoleo lea sa talanoa ma lona atali’i laitiiti, atoa ai ma le  anoanoa’i o le mau fa’amatalaga na tu’u atu e le fafine i luga o le telefoni i lona to’alua, ae fa’ai’u lava i lana fautuaga sa ‘ave i ai, tusa lava po o a ni mau fesili a leoleo e fai atu ia te ia, ia tumau lava lana tali, na te le iloaina le mafua’aga na oti ai Pulusi, e le o ia fo’i na oti ai Pulusi.