Ads by Google Ads by Google

Fagogo Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea ua toe foi mai ai le tama o Fatu mai le momoliina o le faatau a le tamaitai Ofisa lea na alu atu e faatau i le faleaiga a Pinati.]

Na ata le alii pule o le faleaiga e le talitonu i le tala a Fatu peitai i le mafaufau o le tamaititi i le taimi lea, ua ia manatu o le a alu pea lava e momoni niu ta’i 2 i aoauli uma lava i le ofisa o le tamaitai lea, seia paleni ma lana sui lea ua tuu atu ma ia. O le taeao na sosoo ai ina ua usu mai le tama i lana pisinisi masani, na te’i ina ua tu mai se fafine faigaluega ma se feau, o loo mana’o mai le alii pule e fia talanoa ia te ia i se taimi vave lava.

“Talofa alii Fatu, alala ane i le nofoa lena,” o le tala lea a le alii pule, ona savali atu lea o le tama ma nofo i le nofoa, ae o ona mata o loo autilotilo solo i totonu o le ofisa i le manaia ma le matagofie o lona teuteuina. “Atonu ua faateia oe i lo’u valaau atu i lenei taeao e te susu mai ta te talanoa, ona ua ou manatu ou te fia fesili atu ia te oe, pe e te fia faigaluega i la’u faleaiga pe leai, afai e te mana’o e te fia galue ia te a’u, ona ou tuu atu lea o le vaiaso atoa lenei e faauma lelei ai lau pisinisi o loo faatau i luma o le ta faleaiga, a oo loa i le vaiaso fou ona e usu mai loa lea i le 5 i le vaveao e te amata ai i lau galuega fou, o le fesoasoani lea i le teuina o le faleaiga ma faamama totonu e pei lava foi o lau galuega o loo faia i le tele o taimi,” o le talatalanoa atu lea a le alii pule ia Fatu, lea foi na talia e le tama ma le loto fiafia ona o lea ua maua se galuega tumau e fesoasoani ai i lona aiga.

O le aso na soso’o ai na tonu ai i le manatu o le tamaititi o le a alu e ave ni niu malulu se lua i le Ofisa o le tamaitai lea e ana le sui e le’i toe faafo’iina mai lana faatauga i le aso ua te’a. “Susu mai totonu,” o le tala lea a le tamaitai ina ua tu’itu’i atu se tagata i le faitoto’a, ae te’i ina ua tatala atu o Fatu. “Oi, se malo Fatu, o niu na a ai,?” o le fesili lea a le tamaitai ma ona laufofoga fiafia. “O nui na ou sau e aumai ma oe ma lau uo lea sa lua iinei ananafi.” E fai lava tala a le tama ma savali atu ua tuu niu i luga o le laulau ona toe savali mai lea i le faitoto’a o le ofisa o le a toe fo’i ae faapea atu le tamaitai, “Avatu le tupe lea o au niu,” ae tali le tama, “Aua ete popole, a lea e lei taitai uma lau sui lea o loo totoe ia te a’u, faafetai lava i lou agalelei, manuia galuega o lenei aso,” e fai lava tala a le tama ma aapa atu ua tatala le faitoto’a ma savali i fafo. E lei atoa se itula talu ona i ai le tama i le vaega lea e faatau ai lana pisinisi niu, ae ona vaaia loa le fotua’i atu o le tamaitai Ofisa lea sa alu ma ave i ai niu i lona Ofisa, ma faasasa’o i totonu o le faleaiga ma piki mai meaai e 3, o laua ma lana uo teine ae o le isi tasi mo Fatu. Na tuu atu e le tamaitai o le ipu meaai i le tama o Fatu, ona ia fai atu ai loa lea i ai, “afai e maua sou avanoa i le aoauli taeao, ona e alu atu lea tatou te aai i le ma ofisa i le aoauli.”