Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea o loo faia ai le talanoaga umi a le tama o Fatu ma le pule o le faleaiga a Pinati.]

Na momotu faafuasei le talanoaga a Fatu ma le pule o le faleaiga ina ua lolofi mai tagata faatau ona tu foi lea o le tama i luga ma emoemo ona tamaitama’ilima i le su’iina lea o niu a tagata ma faamama ese uma fulufulu niu, ma ua avea ai lana tautua o se tautua ua viia e le to’atele. “Se’i su’i mai lava ni a’u niu se fa fa’amolemole,” na ea Fatu i luga ma ia vaaia ai se tamaitai lalelei toe laei mama o loo tu atu i ona tua, ma ona lima o loo tofu ma le ipu meaai. “E mafai ona momoli atu ata niu i le ofisa la le faasaga mai i le isi itu ala,” o le toe fai atu lea a le tamaitai lea ia Fatu, ona tu lea o le tamaititi ma faapea atu i ai, “e le afaina, muamua atu ae o lea o le a ou alu atu ma au niu taumafa.” E lei uma lelei atu le tala a le tama ae faliu loa le tamaitai ma savali ese atu, peitai o le taimi lea na toe lolofi atu ai isi tagata faatau niu ma toe pisi laititi atu ai ma Fatu i le taimi lea. “Se’i vaai aku lava a’u giu se’i o’u kamo’e aku e ave giu a si mafige la le e savali aku faamolemole,” o le faanoi atu lea a Fatu i le alii pule o le faleaiga lea sa la talanoa, ona ata lea o le alii ma fai atu i ai, “o vae lava ma lima nei e auauna mo oe.”

E fetaui lava le faasaga atu o le tama o le a savali ma niu ae ona vaaia loa le tamaitai lea a ana niu ua ulufale i totonu o se ofisa ma lana faatau o ipu meaai. Na ona taunuu lava o le alii i luma o le faitoto’a o le Ofisa ona tu’itu’i lea, ma te’i ai i le tatala mai e le tamaitai lea na alu atu e faatau. “Se’i tu’u atu lava ata niu i luga o le laulau lale ona e sau lea e avatu lau tupe, faafetai lava i lou agalelei,” e le’i tali le tama i se tala sei vagana ai le ataata ma savali agai atu i le laulau ma tuu ai niu, ona aapa atu lea o lona lima ua uu mai le tupe o loo i le lima o le tamaitai. “Fa’atali atu lava se’i o’u tamo’e e aumai lau sui leaga e le lava sa’u tupe o i ai fa’amolemole,” E fai lava tala a le tama ma savali agai atu i le faitoto’a, peitai e tago atu loa lona lima o le a tatala le faitoto’a ae faapea atu le tamaitai, “Tu’u ma oe le sui ma lou toe tigaina ete alu ma toe sau,” na faliu Fatu ma toe faapea atu i le tamaitai, “Aua ete popole, ou te toe sau ma lau sui nei lava,” ae sa toe fai atu lava le tamaitai, “Leai, a lea ua ou fai atu e tuu ma oe le sui, ua lava niu ia mo le aiga o lenei aoauli,” e le’i toe faia se manatu o Fatu sei vagana ai lona faafetai atu i le tamaitai e tusa ai o le tupe, ona ia tatala lea o le faitoto’a ma savali loa i fafo.

“Makua’i leva fo’i ga e alu alii e ave giu, e foliga mai sa e laki i kokogu o le ofisa, a ea,? o le fesili ata lea a le alii lea na faatali mai i niu a le tama, “E leai, sa kau fai lava le konu o le sui a si keine iga ua ou fai aku sei o’u sau e kala aku laga sui, ae fai mai e ku’u ma a’u ma lo’u koe kigaiga ou ke koe aku atu e avaku.”