Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea na savali atu ai Fatu ma faatalofa i le tamaloa o Iose ma fai atu i ai, afai na te manaomia lana fesoasoani ona logo atu lea o ia.]

Na ona uma lava o le talanoaga a Fatu ma Iose i luma o le fale faamasino i le taeao lea, ona toe faasasa’o atu loa lea o le savali a le tamaititi i le nofoaga lea o loo faamautu ai lana tamai pisinisi faatau niu i luma o le faleaiga a Pinati, ma faaauau ai lava lea o lana galuega masani i lea i vaiaso ma lea vaiaso, ma ua avea ma itu ua toatele ai tagata ua masani ia te ia. O nisi o taimi na te faalogoina ai talasua ma ulaga a nisi o tagata e faatatau i ana ato niu, poo le toganiu ai lea o loo gaoi mai ai, ae o isi e amuamu ma pei e vaai maualalo i lana galuega o loo faia, peitai o ia lu’itau uma e le’i fa’avaivai ai le tama ae ua atili ai ona fiafia i lana galuega faatauniu.

“Sole, ou ke ofo fo’i a’u i le kupu pea o fua o lau koga giu alii, foliga mai e kele sau koga giu o lo’o i ai, a ea,?” o le fesili faaataata atu lea a le alii lea e pule i le faleaiga a Pinati ina ua maua le avanoa la te talatalanoa ai ma le tamaitiiti o Fatu i le isi taeao. “O fagua faikele lava a le aiga lea o loo i ai le pa povi ma le koga giu, lea la e koli mai ai a’u ako giu ia e faasavali i aso uma, e kele foi le koga giu pau le poga e leai ma se isi o le aiga e fia alu i ai oga o le vaoa ma le mamao, lea la ua ou magaku ai ou ke alu e faako’a mai e saili ai se kupe e kausi ai gai o’u kei ma kokogi ai a lakou pili aoga,” o le tali atu lea a le tamaitiiti o Fatu i le fesili a le alii lea, ma ua avea ai ma auala ua manaia ai lava le la talatalanoaga i lea aoauli.

“E le faakagaiga gi faleaiga ma gi pisigisi e pei o lau pisigisi giu e faakau i luma ii, ae ga mafua oga ou kaliaiga oe, o le kele o kaimi ou ke vaaia ai e ke fesoasoagi i la’u aufaigaluega i le kapegaiga o luga o laulau, faamama le lapisi ma isi lava galuega i kokogu o le faleaiga, oga ou iloa ai lea akogu o oe o se kagaka galue faamaogi ma loko fesoasoagi, o ikuaiga kagaka ga e magaomia i soo se fale faigaluega ma soo se pisigisi, akogu o le ala foi lega ua alu mia ai au giu ma ua fiafia ai lava foi kagaka e afea le makou faleaiga,” o mafaufauga ia a le alii pule o le faleaiga, ae na o le luelue ulu lava o Fatu ma ata ae leai sana tala. O le talanoaga lea na faateia ai le alii lea i le mafuaaga ua faatau niu ai Fatu i luma o lona faleoloa, atoa ai ma mafatiaga o loo nofo ma ia e aofia ai le maliliu uma o ona matua, o le oti o le tamaloa sa avea ma ona tama fai, faapea ai ma le ma’imau o lana aoga ona ua manatu o le a alu e saili se tupe e fesoasoani ai i pili aoga a nai ona tei laiti, ina ua leai se isi e faalagolago i ai lo latou aiga.