Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea ua taunuu ai le solaaga a le tamaloa o Iose i lona aiga i Palisi, ma ua feiloai fiafia ai ma si ona toalua ma lona atalii laititi.]

 “O lea ua vela le meaai, sau loa e fai sina meaai e tali ai lou laualo ua alu le aso ailoga  na inu sau ti ananei i le taeao e sau ai i le va’a usu,” o le toe tuli tatao atu lava a le fafine o Lumepa, ma tu atu loa i luga ua savali agai atu i le umukuka, ma asu mai le taumafataga a si ona toalua ma tuu atu i luga o le laulau. O Iose i le taimi lea, e ui o loo lagona lona fia ai, ae i le taimi lava foi e tasi o loo lagona ai lona fefe ona o leoleo ia ua agai atu e saili o ia mai le faalavelave na mafua ai ona oti le tamaloa o Pulusi.

“Se Iose, aveese nisi mea o loo mamafa i lou mafaufau ae sau muamua e tali lou manava ua alu le taeao, ona e alu ane ai loa lea ete faamalu ma fai sina au malologa, sei e ala mai i le afiafi ona maua lea o se isi talanoaga ma tatou eva ai lava, ua ta fia faalogo atu foi i ni tala mai lo tatou aiga i Amouta, poo ai mai si olomatua o Fisaga ma lana toga tapa’a, ai lava o fai le amio o le ala usu i le taeao e faamamago ana fusi tipi ma la’u i le maketi, talofa e isi olomatua,” o le talatalanoa lea a Lumepa i lona toalua, ae o le taimi lea e le o toe popole ane i ai Iose aua o lea ua faafesagai ma le falai moa faapea ai ma le faalifu fa’i Samoa a le fafine lea na fai e faatali ai si ana fanau matutua o loo i le aoga.

O le maea ai o taligasua o le afiafi, na faatoa maua ai loa se avanoa o Iose e talanoa ma fetufaai ai ma si ona toalua ma lana fanau e uiga i lana malaga i Savaii, atoa ai ma le latou mafutaga sa i ai ma lona aiga, sa na o le faalologo lava o le fanau a le toeaina ae faamatala le taimi ao i ai i Amouta i lona aiga, e ala mai lava i le taeao ua uma ona tapena atu le ti o le taeao, e oo foi i le aoauli ma le afiafi e le mafai ona faatamala le fafine nofotane o loo nonofo ma lona uso laititi i le tausiga o le olomatua ma le toeaina.

“Ae aisea na e alu ai i Amouta ao fea foi se oso o le malaga,” o le fesili faafitifiti atu lea a le alii o Vine, o le atalii matua lea o Iose o loo aooga faatasi ma le tamaitiiti o Fatu i le kolisi i Avele, “Se ga ou alu i le ma’i o si o’u kama, lea foi ua pule alofa le Alii ua faasolosolo maguia loga gasegase sa faakaokolia ai i le fale,” e uma atu loa le tala lea a Iose ae latou faalogoina loa se tagata ua tu’itu’i mai le faitoto’a.

“Kakala le faikoko’a,” o le valaau lea a Iose na lagona mai ai e Fatu lea o loo tu i fafo, o lea ua sau Iose. “Ga ou sau ma le sua i’a lea mai i la e fai ai se kaumafakaga a lau susuga a le kiakogo ma le falekua,” o le tala lea a le tamaititi o Fatu ma ata, ona toe oso atu lea o le isi ana fesili, “Oi sole, se malo le malaga maguia alii, ga faaolakia mai agafea lou la ko i le vasa,?”, o le fesili atu lea a Fatu ia Iose, ae o le tamaloa i lea taimi, ua le iloa pe o le a sana tali o le a fai atu.