[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua fa’ailoa atu ai e le tamaitiiti o Fatu i si ona tina fai o Pauline ma nai ona tei, o le toeaina o Pulusi ua uma lona ola i se fa’alavelave fa’afuasei.]

Na ona mae’a lava o le talanoaga lea a le ali’i leoleo o Meki ma le fafine o Lumepa, toe oso loa lea o le ali’i leoleo i lana ta’avale ma latou toe aga’i atu loa ma isi leoleo ia o lo o latou galulue fa’atasi i le su’esu’eina o le mata’upu e uiga i le maliu o Pulusi, ae o le fafine o Lumepa, ua saofa’i ifo nei i luga o le pito o le sofa lea o lo o fa’aputu ai ietoga ma ana fala lili’i, ma tu’u ona lima i ona foliga ma tagi aueue ona o lea ua ia talitonu, e foliga mai o Iose lava lea ua fa’atutu mai i ai su’esu’ega a leoleo. “Mama, aisea e te tagi masusu ai fa’apena, e i ai se mea ua tupu i lo tatou aiga,?” o le fesili fia iloa lea a le tama laitiiti a le fafine lea fa’atoa ala mai sa moe i le fa’ase’e o lo latou fale. E lei tali le fafine se’i vagana ai le atili ai ona tagi i le mafatia o lona loto. E le’i toe fesili le tamaitiiti i se tala, ae ua savali atu ma tu i luma o le fale ma autilo solo pe na te iloaina atu ai ni tagata sa o atu i lo latou fale ua toe fo’i, po o  ni isi fo’i o lo o fou fou e aga’i mai i le fale, peita’i e leai ma se isi na ia iloaina atu.

O le ali’i laitiiti lea na mua’i fesiligia e leoleo i le mata’upu e uiga ia Pulusi ma lona tama o Iose, o ia fo’i lea na fa’amatalaina i leoleo lona fa’alogoina o lona tama o tau ‘upu ma Pulusi i le po lea na fai ai le la inugapia i le umukuka a Pulusi. Na va’aia e le ali’i ua amata ona to’a mai si ona tina, ona toe aga’i atu loa lea i ai ma fesili pe i ai lava se mea matuia ua mafatia ai lona loto ua ala ai ona tagi. Na fa’amatala atoa e Lumepa isi ana tama leoleo ia na o atu i lo latou fale, fa’atasi ai ma la latou tala o le afiafi o le aso lava lea e malaga ai i Savai’i e sa’ili mai Iose, ona ua i ai lo latou masalosaloga ua mafua ona solasola Iose atonu e i ai sona so’otaga i le fa’alavelave lea na maliu ai Pulusi.

O le le to’a tele o le fafine o Lumepa na i’u ina ia viliina ai le telefoni o le fale Komiti a le nu’u lea o lo o nofo ai Iose, ma tau atu ai i le fafine o lo o tiute i le fale Komiti i le aso lea, “Se fa’amolemole lava pe mafai ona momoli atu le poloa’i lea i le aiga o Iose pe mafai ona telefoni vave mai e i ai le fa’alavelave matuia lea o lo o tula’i i lo matou aiga i le taimi nei,” o le talanoa atu lea a le fafine o Lumepa i le telefoni ma lona leo tau le lagona, ona tali mai fo’i lea o le fafine sa ia taliina mai le telefoni, “Ua lelei, sei va’ai aku se kamaikiiki e alu e momoli le poloa’i i le fale lega e fai lava si mamao o le fale o le aiga o Iose ma le fale komiti, ae ua lelei.”