Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo foi le onosai, ae alo mai loa o le toe sosooina lenei o la tatou tala faasolo, lea na gata mai i le vaiaso na tea nei i le taimi lea ua tonu ai i le mafaufau o le tamaititi o Fatu, o le a le toe faalavelave lava i le tamaitai o Tamara ma ana galuega, ona o ia o se tagata e pisi i lana galuega.]

O le vaiaso muamua o Fatu i lana galuega fou i le faleaiga na sui ai foi isi lagona i lona loto, e le gata ua fiafia ua maua se tupe mo lona aiga ae ua feiloa’i atu ai foi i le toatele o tagata, aemaise lava i latou sa masani ona faatauina ana niu a’o faatau i luma o le faleoloa, ma ua le misi se aso ma le faamalo atu o tagata ia te ia e tusa ai o lana galuega fou ua maua.

“Sole, e ese lou fomu alii Fatu i lau toniga fou lena ua i ai, ua e le toe aliali atu lava i o, a ea?” o le tala ata lea a Tamara i le tamaititi o Fatu, ona la talanoa lea o ni nai minute a’o fa’atali le faatau a le teine o la ipu meaai ma lana uo o loo la faigaluega faatasi, ae ina ua sauni le teine o le a toe fo’i, sa ia momonoina i le taga o le ofutino a Fatu le tupe ma lana tala, “o lau lunch lea o le aoauli, ae alu atu i lo’u ofisa e i ai le mataupu lea ou te fia talanoa atu ia te oe.” E leai se mataupu sa fia talanoa ai Tamara ia Fatu, sei vagana ai lona naunau pea i le tamaititi ina ia alu atu i lona ofisa i aso uma la te mafuta, tali e ma fai ni poka malie ona o Fatu o se tagata e agamalie. O aoauli o aso taitasi ia na afua mai ai le mafutaga vavalalata a Tama ma Fatu mo se taimi umi lava, ma ua avea foi i laua ma tagata matutua ma faai’u ai loa i le tuu faatasia o i laua ma avea o se aiga.

O le agaga atoa o le teine o Tamara, e fia fesoasoani ia Fatu ma lona aiga ina ua ia iloa o ia o se tamaititi ua matua oti. Na i’u manuia aoga a tuafafine a Fatu i lana galuega sa totogi ai a latou pili, faatasi ai ma le fesoasoani atu a Tamara i le itu tau tupe, ma ua avea ai foi le isi tuafafine a Fatu o se loia, ae o le isi toatolu sa avea uma i latou ma faiaoga e pei foi o le latou tinoa. Na maliu le fafine o Pauline ina ua matua ma tanu ai lava i le aiga o lana fanau fou i Amouta e faamanatu ai lona loto alofa ma lana tausiga ia Fatu ma nai ona tei. I le aiga o Fatu i Palisi, na solofua le faamasinoga a Iose ina ua le mafai ona faamaonia o ia na mafua ai le maliu o le tamaloa o Pulusi, peitai talu mai le aso mulimuli o le faamasinoga, na fai ai le tautinoga a Iose o le a le toe tago i le ava, ma o se lesona taua foi lea mo ia.

O le faaiuga o le tala, ua avea Fatu ma lona toalua o Tamara o nisi o faipisinisi iloga i le nuu o Amouta, ma o ia foi o se tagata e loto alofa ma loto fesoasoani i soo se tagata pagatia o le nuu, e pei foi ona faia e Tamara ia te ia, faapea ai Pulusi ma lona toalua o Pauline, ina ua fesoasoani uma i latou nei i le atina’eina o lona aiga, ma e ui e le’i taunuu moomooga a ona matua peitai na i’u lelei olaga a Fatu ma nai ona tei. O le faaiuga lena o le tatou tala faasolo, faafetai i le mamalu o paaga masani a le tatou polokalame, ae tuli tatao mai le tatou tala faasolo fou i le vaiaso fou ua faaautuina, O KATI LE LEOLEO NANA.