[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua tuu atu ai e le faiaoga upu faamalosi au i lana vasega, aemaise i alii e toalua ia o le a le toe foi atu i le isi tausaga aoga e sosoo ai, ina ua maua la avanoa e ulufale atu ai i isi aoga..]E pisa mai lava le tamaitai faiaoga o Lupe i ana toe upu faamalosi au i le vasega, ae na o le punou lava o le tamaititi o Lisati ma vanevane i lona atigilima umi le pito i luma o le kesi lea e nofo ai. O le kesi lava lea na faaaoga ma e le tama mai le taimi na faatoa vasega 9 ai, lea lava ua faauu i le vasega 13 o le kesi lava lea sa ia faaaogaina, aua o aoga i aso ua mavae, o ni isi o tausaga e fesuiai vasega ae tumau lava potu aoga e faaaoga ona o le utiuti ma le le lava o potu aoga sa maua e le malo i na taimi.O luga la o le kesi aoga a le tamaititi o Lisate, o lo o matamata tetele ai le igoa o lona tama, o Lisati, lea foi o lo o faaigoa ai o ia, o le isi pito o le kesi o lo o tusi ai le ata o le kaupoe ma lana fana, ae tusi uma ai i lalo ane igoa o le aiga o le alii ae mulimuli ai lava le igoa o Lasela i le pito lava i lalo, e tau le iloa atu foi e se isi sei vagana ai lava o ia e iloa ma malamalama i ai. E fetaui lava le maea ane o le tautalaga a le faiaoga ae maua loa foi e le tamaititi o Lisati o le to’a e tautala ai, ona manatu loa lea o le a tulai e fai sana upu faamavae i lana vasega, aua o lea o le a alu e le toe aoga i le aoga lea. Ua sao uma tamaiti o le vasega e oo lava foi i le faiaoga ua na o le punou lava i lalo ma melotagi, sei vagana ai lava le tamaitai o Lasela ua matua tagi masusu lava i le ootia o lona loto i le alofa i le tamaititi, ao faagasolo le tala faaiu a Lisati, sa ia molimauina le alii o Matini o lo o pupulato’a atu ia te ia ao tulai i luma o le vasega, ma o se faamalosi au lea mo ia i le taimi atoa na tulai ai i luma o le vasega.Ua maea le fiafia ma ua faamavae atu foi tamaiti o le vasega ma le faiaoga ia Lisati ma Matini o le a o e le toe fo’i atu i le isi tausaga. Ua tau fai tuu atu uma e tamaiti ia Matini ma Lisati a latou imeli ma numera telefoni e fesootai mai ai le au alii ia pe afai ae malaga atu i la aoga fou o le a aooga ai, ai sa manatu nai tamaiti, e fai fua telefoni i soo se taimi e vili mai ai Matini ma Lisati ia i latou. O Lasela lava o le vasega na mulimuli i ai le tama o Lisati, ona ua ia manatu, o le la toe feiloaiga foi lea ma lana manamea leaga o le afiafi a taeao e tuuvaa atu ai i Apia ma ona matua, mo le faataliina o le taimi o lana vaalele i le 10.00 i le po. Na ona uumau lava e le tama o le lima o lana uo, o le taimi foi lea na pei ai o ni timu to o la loimata.