[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua ai le avanoa o tama o le au e o ai e asiasi i o latou aiga i le afiafi ina ua uma le ulua’i aso o le taamiloga lakapi a tama aoga i Niu Sila.]

Ua le iloga se tala malie e faalogo i ai Lisati, o ana uo ma ni isi o le au i faleaitu lea ua amata ona ta a lona aunty, ma ua atili ai le fiafia o le tamaititi i le vavalalata i le latou mafutaga ma lona aiga aemaise ai o ana uo. Ua uma ituaiga faafiafiaga ua fai e le olomatua i luma o lana fanau atoa ai ma latou uo, ae ua faasolo atu nei talanoaga i le tulaga mataina sa i ai le taalo a le tama o Lisati i le ulua’i aso o le taamilosaga lakapi a aoga, ona e le’i misi lava se taaloga mai ana taaloga uma e tolu ma sikoa ta’i lua na ia mauaina mo lana au, ma ua aga’i atu nei le au a le Iunivesite o lo o aoga ai Lisati mo le sailia o le Ipu autu ma se tasi o au malosi o le taamilosaga.

A’o faia talanoaga a le aiga i totonu o le potu malolo o le fale e faatali ai le taavale e toe piki ai Lisati ma lana uo mo le toe fo’i atu i le camp, ae faafuase’i loa ona tatagi le telefoni a le aiga. O le aunty a le tamaititi na tu atu i luga ma tali le telefoni, ae na te’i ina ua faalogo atu o le telefoni mai Samoa. “Talofa, o ai ete fia talanoa i ai,” o le fesili lea a le aunty i le tagata o lo o vili mai Samoa. “Se faamolemole pe maua atu Lisati,” o le tali mai lea a le tagata, “O ai lea e saunoa,” o le toe fesili lea a le aunty a Lisati, ae na te’i ina ua faapea mai le leo, “O Lasela lea e i luga o le telefoni ....”. Na tu le olomatua mo ni nai sekone ona faapea atu lea ia Lisati, “Lisati, o aunty Lasela lea e vili mai Samoa.” e le’i toe faatali le tamaititi ae ua tu atu i luga ma savali atu loa i le vaega o lo o i ai le telefoni ma tali loa le telefoni, “Talalofa Lasela, o Lisati lea,” na ona uma lava o le tala lea a le tama, le toe faalogoina loa sona leo ae na o le tu tu lava ma uu le telefoni, e le’i umi ae vaaia e le aiga ma ana uo le maligi lemu ifo i lalo o loimata o le tamaititi ua tagi, ae o le taimi fo’i lea e le’i toe faalogoina se gase i totonu o le fale, ae ua tau fai faalologo uma tagata a’o tagi le tama i luga o le telefoni.

O Lisa lava na muamua tu i luga ma savali atu i le vaega o lo o i ai Lisati ma po po le papatua o le tamaititi ma fusi atu o ia e aunoa ma sana tala na fai atu i ai. Na pau upu na mafai ona lagona e le aiga o tautala ai Lisati ua na o le faapea atu, “Tago e vili mai la’u cell ona o lea ua tu mai le taavale e toe momoli ai matou i le camp a le matou au ...” na ona uma lava o tala ia a le tamaititi ona ia tuu lea o le telefoni i lalo, ona faasaga atu lea ma faafetai atu i le Samaria Agalelei o Lisa e tusa ai o lona faaloto tele ia te ia, ona la savavali toalua mai lea i lalo ma saofafa’i i luga o le nofoa, ae o le taimi lea ua vaaia ai e le aiga le mafatia o le tamaititi i ona foliga, ma ua avea ai ma itu na popole ai lona aunty ina ne’i avea le faanoanoa o le tama ma itu e aafia ai ma lana taalo.