[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na ote ai le aunty o Lisati i le tamaititi ona o le faalavelave soo atu o lana uo o Lasela i Samoa, ma fai i ai le olomatua, e le tatau ona toe mafaufau fua ia Lasela o lo o i Samoa, ae faamuamua lana aoga na ala ai ona tuua lona aiga ae alu atu i Niu Sila.]

E ote atu lava le aunty a Lisati i le vili soo mai o lana manamea mai Samoa, ae le o ano ai lava le tamaitiiti i nei mau tala e avaavau atu ai le olomatua, ae na o le punou lava ma tope le tapenaina o lana ato lavalava atoa ai ma ana mea uma e manaomia i le taimi o le camp. “Vaai le tupe lea e faatau ai se isi mea e te manaomia i le taimi o le camp, ae a i ai se isi mea e te manaomia ona e toe telefoni mai lea,” o le tala lea a le olomatua ao punou e tuu atu le $150 tala i tafatafa o le ato a si ana tama o Lisati, ona toe savali lea i fafo ma le potu ma faasasao loa i tua i le umukuka ma amata ona tapena le meaai o le afiafi mo lana fanau e lei tuua atu aemaise ai le toeaina toeititi manava atu i le galuega.

“Tofa aunty ...” o le faatofa lea a Lisati ma sogi atu i le olomatua ona savali lea i luma o le alatele e faatali ai le pasi e tietie atu ai i le taulaga, peitai na te’i i le sosolo atu o le taavale a Lisa ma tu i ona luma, “sole, na vili lelei mai lava i le olomatua e fai atu ia te oe e aua e te alu ae faatali ou te sau piki oe, ua laki la lo’u vave sau alii, se manu ou te sau ua e alu atu i le pasi ..” e saputu mai lava le mau tala a le tamaitai ae leai lava ma se ano atu i ai o Lisati, sei vagana ai lona aapa atu tatala le faitotoa pito i tua o le taavale ae tuu i ai lana ato, ona ia toe tatala lea o le faitotoa pito i luma ma oso ai loa i totonu. “ou ke vaai aku pei lava e i ai se mea o faalekogu i lau susuga i legei afiafi,” o le isi lea fesili a Lisa, ae o Lisati i le taimi lea ua ata ma faapea lana tala, “e leai, ua ou fiafia ina ua maua la’u lifi i le camp ..” o le tali atu lea a le tamaititi ae na toe tuli tatao atu i le isi fesili a Lisa e faapea, “o fea gi mea e fiafia ua maua lau lifi ae faauu ou guku eke le fia kaukala mai ..” o le tala lea a le tamaitai na alu ai le tali e a le toalua lea ao alu lava le la taavale, ma faafuasei ai loa ona afe i le isi fale’aiga tele lava o lo o tu i le taulaga, ona fai atu lea o le tamaitai ia Lisati, la te afe i le faleaiga lea sei fai sina meaai ona alu ai loa lea e momoli o ia i le camp. Na vaaia e Lisati totonu o le fale’aiga lenei, e na o tupulaga lava e tumu ai, ma o le fale’aiga pito taugata foi lea i totonu o Niu Sila lea ua ave i ai o ia e Lisa. Ua silia ma le 3 masina talu ona i ai Lisati i le atunuu ma ua masani foi i le tele o nofoaga, o meaai aemaise ai o le ituaiga olaga o lo o ola ai tagata i Niu Sila. Ao nofonofo le tamaititi ma Lisa i luga o le laulau e faatali le la oka, na te’i le tama ina ua faapea atu le tamaitai ia te ia, “Sole Lisati, o a’u e i ai le mataupu lea ou te fia talanoa atu ai ia te oe ...”