Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na te’i ai le tama ina ua taunuu i le fale e tapena lana ato mo le camp a le latou au lakapi i le aoga, ae tatagi lana telefoni, ma le tago atu e tali, o Lasela lea o lo o vili mai i Samoa.]

 

E le’i faigata ia Lisati ona mate le leo o lana manamea o Lasela ina ua hello atu i le telefoni, “Talofa Lasela, aisea e galo ai fua lou si’ufofoga, pei ua ou toe ola mai ina ua ou faalogoina lou leo, na faafefea ona e mauaina la’u telefoni ....” ua le iloga se mau fesili e tuu fesili ai le tama e faatatau i le tamaitai o lo o nofo i Samoa, e faapena foi i le tamaitai, ua le masino se mau tala e fesilisili atu ai ia Lisati i le tulaga ua i ai lana aoga aemaise ai o lona aumau ai i Niu Sila i nai masina talu ona ia tuua Samoa. “O lou uso laititi o Pega na aumaia lau numera ia te ia, sa ou fesili i lou tina i le lotu i le aso Sa ina ua ma talanoa, ae fai mai e leai sau numera o i ai, ae ina ua ma fetaui ma Pega i luma o le fale o Eki, na ou fesili ai loa i lau numera, ma ia tuuina mai ai loa ananei i le taeao, lea ua ou vili atu ai loa ..”

 

E ui i le loto fiafia o le tamaititi ina ua toe maua le la fesootaiga ma Lasela, peitai ua ese ona lagona ina ua talanoa atu le tamaitai e faatatau i le musu o lona tina e faailoa i ai lana telefoni, o le faafitauli sa i ai, sa le’i i ai se telefoni a Lasela e mafai ai ona la fesootai ma Lisati, peita’i o lea ua maua le la fesootaiga ma ua iloa e le isi le numera a le tasi. O se tala fiafia mai Samoa e pei ona momoli mai e le tamaitai, o ia lea ua aoga i le aoga faafaiaoga i Malifa mo le umi e 3 tausaga, ma ua fiafia foi i le isi laasaga lea ua agai atu i ai, ae na faailoa atu i ai e Lisati tulaga uma e uiga i le aoga ma ua fiafia foi i le tele o tamaiti Samoa o lo o aooga ai lea foi ua latou masani.

 

Na ona uma lava ona faatofa o le tama ia Lasela i le telefoni, togi loa ma le telefoni i luga o le moega ae pe’ape’a loa lana gaioi i le tau tapenaina o lana ato mo le camp. “Sole Lisaki, o a ea mea eke pisi ai, o ai ga sa lua kalagoa i le kelefogi,?” o le fesili faitatala ane lea a le fafine o Mekala le aunty o le tamaititi lea e nofo ai. “O lea e tau tapena atu la’u ato mo le camp a le matou au lakapi,” o le tali atu lea a le tamaititi ma pisi lava i le gaugauina o ona lavalava i totonu o lana ato, “A’o ai sa lua kalagoa,?” o le toe tuli tatao atu lea a Mekala, “Se o la’u uo mai Samoa ga vili mai e asi mai a’u,” o le toe tali atu lea a le tamaititi, ma savali agai atu i tua i le umukuka ina ia momotu ai fesili a lona aunty lea ua amata ona togi togi atu. “Ai fo’i o Lasela ga sa vili mai, a ea, ia fai ia Lasela soia le faalavelave o lea eke pisi i lau aoga, e leai se mea e ke koe mafaufau ai fua ia Lasela o lega ua fai ma sau Lisa e piki oe kou ke kafafao ma fai faakasi kou mea aoga,” o le ote lea a le olomatua i le tamaititi ma faapupusa lava lana sikaleti i luma o le faapaologa o le fale.