Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na faalogoina ai e le tamaloa le leo o lona atalii o lo o tagi atu i luga o le telefoni.]

 

Na pei o le timu to loimata o le tamaloa o Melusa ina ua ia faalogoina le leo o si ona atalii i luga o le telefoni. A’o taumafai Lisati e faatoa lelei lona mafatia aea talanoa i si ona tama, na te’i ina ua ia faalogo atu, ua ese foi le le lea ua talanoa mai i luga o le telefoni, o le leo o si ona tina, ma o se fiafiaga i le aiga i lea po le tulaga ua latou faalogoina, o Lisati lea ua valaau atu ma faailoa atu o lo o manuia o ia ma lona aiga fou lea ua latou mafuta. E silia i le itula o fai talanoaga a le aiga ma le tamaititi, a uma ona talanoa le ulugalii ona faasolo atu lea o nai ona tei laiti i le telefoni, ma ua toe suia atoa ai lagona faanoanoa o le tamaititi i le fiafia ma le loto tele, ona o lea ua maua le avanoa e faamalosi atu ai ona matua ia te ia ina ia faamalosi i le aoga ma usutai i ona matua fou lea ua latou mafuta nei.

 

O le vaiaso lona lua o Lisati i Niu Sila na ave ai o ia e lona aiga ma faamatamata i le tele o mataaga matagofie i le atunuu, ma o se fiafiaga lea i le tama ina ua maua le avanoa e vaai ai i le tele o nofoaga mananaia i totonu o Niu Sila, toe pu’e ai foi ma ona ata, ae faaiu lava i le faamatamata o ia i le Iunivesite tele lea o le a aoga ai, ma o se vaaiga na maofa ai le tamaititi ona o se aoga e matua sili ona tele le lotoa. Ua sauni le tamaititi mo le ulufale atu i le aoga mo le aso o le lesitala. Ina ua ulufale Lisati i le lotoa a le aoga, sa maofa ai i le toatele o tamaiti aoga o lo o tumutumu ai, o tamaiti aoga mai atunuu eseese o le lalolagi aemaise ai foi nai tamaiti Samoa o lo o filo mai ai. Na fiu le tama e tau autilo pe i ai se isi e masani ai e leai ma se isi, ona faasasa’o atu loa lea i le isi nofoa  lena o lo o avanoa ma nofo ai loa, e tau faatali ai se faamalama e avanoa ae sei alu e fesili i ai mo se faatonuga mo ia. A’o nofonofo Lisati na o ia i luga o le nofoa lea, na te’i ina ua savali atu lava se tamaitai ma fusi o ia ma faamalo atu i lona igoa, na te’i le tama o Lisati ina ua tepa a’e i luga sa ia vaaia ai le tamaitai o Lisa lea sa la nonofo faatasi mai i luga o le vaalele, o ia lea o lo o talanoa atu ia te ia, ona ata lea o le tamaititi ma tago atu ua fusi mai le tamaitai, ma fiafia ai loa ina ua maua le tagata la te talatalanoa ma faamasani i ai.

 

O le galuega a Lisa sa fai i le aso lea, o le faamatamata lea o Lisati i totonu o le lotoa a le aoga, ma faailoa i ai nofoaga eseese atoa ai ma le faamasani atu o ia i isi foi tamaiti aoga Samoa o lo o aooga ai i le Iunivesite. O le itu na mataina ai le vaai a nisi o tamaiti Samoa o lo o aooga i le aoga lea ia Lisati, e le gata o ia o se tagata tino lelei ma maualuga, ae foliga mai o se tagata e talenia tele foi i le taaloga o le lakapi.