Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na taunuu ai le tama i le malae voli ae ona vaaia loa le savali o Lasela i totonu ua oo i le taimi e taaalo ai lana au.]

Na ona savali atu lava o le tama, saofa’i i luga o le oganiu o lo o faalava mai i le isi itu o le malae voli, ona alo mai ai loa lea iina o lana tapuaiga, ao pisi le tupulaga i le voli o le afiafi, ma ua avea ai ma itu ua le lelei ma le taalo a Lasela ona o Lisati. O le maea ai o le voli i le afiafi lea, na maua ai loa ma le avanoa o le tamaititi e talanoa atu ai i lana manamea mo se taimi umi, ao tau mumusu solo tupulaga tama ma teine o le nuu ina ua latou molimauina, e foliga mai e feoa’i le to’alua lea.

“Sole, pei a e uo le koalua le la, a ea,” o le tala tau mate lea a le alii o Pegi i isi alii o le tupulaga, ao latou savavali ane i luma o le alatele e aga’i i le aai, ao nofonofo mai lava Lisati ma Lasela i luga o le oganiu o lo o i tafatafa o le malae voli, “ia kailo, akogu e sa’o ou mafaufauga, ae o mea faapegei e uma age lava ua o kama o keige,” o fika ia a le alii o Maselusi, o le tamaititi o le pitonuu a Lasela, ae mo Lisati i le taimi lea, na te lei toe maimauina se isi sekone e nofonofo ai, ae o lea ua amata ona fofola ona lagona alofa i le tamaitai e tusa ai o le la mafutaga, ma ua pei o se pese malie i le faalogo a Lasela tama a le tamaititi o Lisati e uiga ia te ia ma le la mafutaga.

“Se Lasela, ou te iloa e faigofie lava a’u ma o’u matua aua o lo’u tina o se tagata e malamalama i mea faapenei, ua tele foi tala a fafine o le nuu ua oo atu i taliga o lo’u tina e faatatau ia te ia, pau lana fautuaga, ia faamuamua la’u aoga,” o le talanoa atu lea a Lisati i le tamaitai. “O lena ua e iloa, o le tausaga fou ou te tuuvaa atu ai i Niu Sila mo la’u aoga, ae ou te le o iloa ia te oe pe o le a sau fuafuaga o i ai, pe faaauau lau aoga pe o le a saili sau galuega e te fesoasoani ai i le pisinisi a ou matua, tasi le mea e tatau ona e iloa, Lasela, ou te alofa ia te oe,” e fai lava tala a le tama ma aapa atu lona lima ua uu mai lima e lua o le tamaitai, ona ia oomi lea ma uu mau mo se taimi umi, ao pupula to’a atu i ona foliga lalelei, ae o Lasela i lea taimi, e leai sana tala sei vagana ai le maligi o ona loimata, ona faapea lea o lana tala, “Vaai oe Sati, e le mafai e se isi mea o le olaga lenei ona toe taofia lo’u alofa mo oe, ou te taumafai foi e faataunuu fuafuaga uma ua e manatu i ai, pau la’u tatalo, alu e faamuamua lau aoga, afai ete fo’i mai i le isi 3 tausaga, ona ta sauni loa lea e fai lo ta aiga.”