Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua savali atu ai le tina o Lisati i le faleoloa mo le faatauina mai o mea e fai ai lana pie ma le keke mo le faamavaega a lana vasega.]

E lei toe gagana le olomatua i se isi upu, ae ua savali atu loa, uu mai lana ato laufala sa tautau i le pou o le fale, faamaulu ona seevae tosotoso ma savali telea’i loa i le faleoloa o lo o i le isi itu o le nuu, ae le o le faleoloa o Mose lea na fetaui ai Lisati ma Lasela. Na ona u mai lava o le patua o le olomatua ua savali i le faleoloa, savali loa foi ma Lisati i le umukuka ma amata ona tapena le suavai o le afiafi, aua o feau masani ia i le olaga o le tamaititi Samoa. Na pei e selo mea uma i le mafaufau o le tamaititi i lea afiafi, aua o lea ua tonu i lona mafaufau, ua maea lana pie ma le keke na ofo ai mo le ‘aiga faaiu a lana vasega.

E maea loa ona fetui maa o le umu ae tatagi ma le telefoni a le tamaititi, ma le vaai atu, o Lasela lea o lo o vili atu. Na tuu uma lava feaui o le umu ae tali le telefoni, ona toso ai lava lea o le ili pe tusa o le 10 minute, ana le vaai atu lava le tamaititi ua amata ona aasa ma’a o le umu ae lei vavalua talo, e le faapea atu i le tama’ita’i, “se’i uma oga ou koe vili aku lea leaga o lea ua aasa maa o le umu ae lei vavalua ma se kalo,” na ata Lasela i le tala a Lisati ona faatofa lea ma tapuni le telefoni. Tailo i tagata fai maneta i le vave o a latou gaioi pe maua le vave o gaioiga a Lisati i le taimi na tuu ai i lalo le telefoni, ui o lea, ua masani le tama i le olaga faa Samoa, o le tapenaina foi o le suavai e le o se galuega mamafa, ae o galuega lava ua masani ai le taulealea Samoa.

Sei o tatou liliu atu lava i le tina o le tamaititi lea ua taunuu atu nei i le faleoloa, ma oka loa lana faatauga mo mea e manaomia i le faiga o le pie ma le keke. E fetaui lava le maea o le faatau a le fafine o le a savali ese ma le faleoloa, ae tofu atu loa ma le ula lea o Lumepa, o le fafine e nofotane atu i le tamaloa o le nuu, ma patato atu lana tala i luma o le tina o Lisati e faapea, “Suga, ga oo aku i o le evaga a Lisaki ma Lasela,?” na tu le tina o Lisati ma pupula to’a ia Lumepa ona tali lea, “E leai, a Lisati la e fai lana umu,” o le tali filemu lea a le olomatua na toe mimilo ai le isi fesili na tau toe togi atu e Lumepa, ona la faatofa lea ma toe foi atu loa lea o le fafine i le fale.