Ads by Google Ads by Google

FAGOGO: POLOGA I LE ALOFA

E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua faamavae ai le tama o Lisati i lana uo o Lasela ma toe foi loa le tagata i lona aiga, ae o lo o faamatatasi atu ai isi faafine nofotane o le nuu i la talanoaga sa faia.

“Kafefe ae iloa e Lupe faiga a Lasela lea e fai i luma i i, loga uiga e faalogologo uma le guu i le pi a le fafige aua o le sifi o fia kagaka, e fai mai lava ga ia o loga aiga ma laga fagau e le faakusakusaiga i isi aiga o le guu, a ea,?” o le talanoa atu lea a Elisa ia Lumepa, o fafine nofotane ia o le nuu sa nofonofo i lalo o le ulu lea e i tua o le faleoloa ma faasusu a la pepe, ina ua la vaaia le tama ma le teine i luma o le faleoloa. O le fafine o Elisa ma Lumepa, e tausoga o la ta’ito’alua, e aiga uma o la taitoalua i le tina o Lisati, o le ala foi lena sa la fiafia ai ina ua la vaaia le toalua lea i luma o le faleoloa, ma ua amata ai ona faamaonia ni isi o manatu sa tapisa solo ai ni isi o le tupulaga, fai mai e fai le uo a le toalua lea.

E lei uma lelei atu le tala a le fafine o Elisa ae oso atu Lumepa ma fai mai, “Kau a ge’i ke’i ua magaku faamaualuga Lasela i le kamaoaiga o lo o maua e oga makua, ae a faakusakusa i kulaga o aoaoga, e le kaikai kukusa o la mafaufau ma Saki, e poko faaafe aku ai Saki ia ke ia poo isi lava foi kamaiki aoga o le kakou guu, a ea,?” o le talatalanoa atu lea a Lumepa ae na o le luelue ulu lava o Elisa ua le toe gagana.

E toso lava le ili a le toalua lea ae o le taimi lea ua taunuu ai Lisati i lo latou fale, ona ata lea o lona tina mai atu i lana tama, “O fea la le faakau ga e fai mai eke alu e aumai ia Lasela, kalofa e isi a’u kama ua kau maua i le ma’i leaga o le maga’o,” e fai lava tala a le olomatua ao ona lima e le o malolo i le tosi ina o laufala e lalaga ai fala lilii ma fala papa o lana asiasiga i le mafutaga a tina o le aulotu. “Se tina, ae a pe a tuu ia au galuega ae sau ta o i le faleoloa e faatau mai ai mea e fai ai pie ma le keke o le matou ‘aiga faamavae faamolemole,?” o le augani atu lea a le tamaititi i lona tina. “Lea na ou sau ma le tupe na aumai i si a’u uo o Lasela e faatau ai mea e fai ai le pie ma le keke, sau ia ta o la’a tuai,” e fai lava tala ia a Lisati ma alu atu ua tuu le tupe i tafatafa o lona tina na te lei faitauina pe fia lea tupe, ona savali loa lea o le tamaititi i tua i le umukuka, ae aapa atu lona tina ua faitau le tupe, na ona uma lava ona faitau e le fafine o le tupe ma ia iloa ai e $100 le aofai o le tupe, ona faasaga lea ma pupulato’a i le itu lea o lo o pisi mai ai si ana tama ma faapea ona mafaufauga, “talofa e ia Lasela, atonu o lona alofa i si a’u tama ua mafua ai ona ia aumaia lenei tupe mo ia.”