Ads by Google Ads by Google

FAGOGO: POLOGA I LE ALOFA

E faatalofa atu i le mamalu o le au valaaulia i lenei taeao fou, faamoemoe o lo o manuia outou uma i tiute ma faiva o lo o outou galulue ai. O le auaunaga lenei a le tatou polokalame o le Toasavili, e ala i le momoliina atu o fagogo ma tala faasolo e faatoa filemu ai lou finagalo ao alo atu ai i le faaiuga o vaiaso taitasi. Ae alo mai loa o le tatou fagogo fou lenei ua faaautuina, POLOGA I LE ALOFA

“Valasi, Valasi, suga Valasi,” o le valaau musumusu atu lea a le alii o Risati i le tamaitai o Valasi lea o lo o fealuai i totonu o le latou fale talimalo ae ua malu ane lava le afiafi o le aso Toonai, le aso lea na la tuu tala la te fetaui ai i le Bingo a le mafutaga a tina i le po lea, ao lumana’i ai le vaiaso lea o le a malaga atu ai le tamaititi o Risati i Niu Sila mo ana aoaoga. Pe silia i le faa 10 ona valaau Risati ia Valasi ae leai lava ma se lagona mai e le tamaitai, leaga o lo o ola leotele le laau pese a le tama o lona tina lea o lo o nofo i le tamai faleoo lea e sosoo atu lava ma le fale talimalo, ae o le isi foi itu, o lo o pisa solo tamaiti laiti o le aiga i a latou taaloga aua ua lata mai foi le taimi e tuua ai aoga mo le tuuaga mulimuli o le tausaga. E lei manao Risati e vave alu ese ma le vaega o le auala lea o lo o tutu ai, ona o lona naunau e fia talanoa i lana manamea ao lei leva tele le po. “Ua ke’i lava ua le ago mai le kagaka lea ia ke a’u, ae sa le’i faapea lava i le kele o aso, foliga mai e i ai se mea ua kupu,” o le talatalanoa toatasi lea al e alii o Risati i lona loto ao taamilomilo solo ai i lalo o le tamalii lea o lo o tu tonu lava i le pioga o le auala lea e lafi ai.

O Risati, o le ulumatua lea a ona matua mai tamaiti e toa 4, e na o ia lava le tama ae  toatolu ona tuafafine, o ia foi lea ua muamua maea lana aoga i le kolisi i Leulumoega, ma ua sauni e malaga i lana avanoa sikolasipi i Niu Sila m o le 4 tausaga. O Risati ma Valasi, e tupulaga lelei lava, sa aooga faatasi i le aoga tulaga muamua a le nuu, ona o eseese  lea ina ua matutua, o Valasi i le aoga a St. Mary i Vaimoso ao Risati i Leulumoega. O le faaiuga o suega a vasega maualuluga na faamanuiaina ai Risati i se avanoa sikolasipi i Niu Sila, ae lei maua mai lava se tala ia Valasi i se tulaga o lana aoga. O se mafutaga ua mafana ma vavalalata le mafutaga a le alii o Risati ma Valasi, peitai o le faafitauli o lo o tulai mai, e le fesootai o la aiga i mea faapenei, aua o le aiga o Risati o le isi lea poutu malosi o le nuu, aea o le aiga o Valasi o se aiga faipisinisi, ui o lea sa lei avea ia  tulaga i le va o aiga ma itu na punatia ai le mafutaga a le toalua lea, ma ua atagia mai ai i gaioiga ma la mea uma e fai, ua uluulu le alofa, ma ua pologa foi le isi ona o le alofa i le tasi.