[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na faatonu ai e le Tuua o le nuu o Amouta matai ina ia ola le pagota.]

Ua ese lagona o matai o le nuu na o atu e faataunuu le finagalo o le nuu, ina ua faateia latou i le tulaga lea ua toe sui i ai le faaiuga a le Tuua o le nuu, ui o lea, e leai se isi na toe fai loto ae sa latou talia ma le agaga faafetai. E muliga foi vaaiga i totonu o ata tifaga pe a oo i le taimi e toe sefe ai e le tama o le ata se tagata na fuafua e oo i ai se faasalaga matuia, ma le vaaiga lea ua molimauina i totonu o le nuu o Amouta i le afiafi lea. O le taimi lava na mae’a ai le saunoaga a le Tuua o le nuu, na vaaia ai le ietoga lea na pulolou ai Lasela, o lona tina, o ona uso ma tuagane faapea ai isi tagata o le aiga ua lelea ese ina ua toso ese e Lisati ma Lisa, ae o le taimi lea e leai ma se isi o le aiga na gaioi pe tu i luga, ae na o le punonou ma loimata o le fiafia, ina ua faaolaina uma i latou ona o le agalelei o Lisati ma Lisa.

O Lasela lava le tagata o le aiga na muamua tu i luga ma oso atu ua fusi le tamaitai o Lisa o lo o tu i ona tafatafa, ma faafetai atu i ai ma ona loimata, na mae’a ona aapa atu lea ma fusi le tama o Lisati ma faapea atu i ai, “Sati, faafetai i lou loto fa’amagalo ia te a’u ma lo’u aiga, faamagalo a’u ma lo’u aiga ona o le mea sa tupu, a ia manuia oe ma le lumana’i o le lua aiga ...” Na tagi le tama o Lisati i upu faatoese a Lasela, ina ua toe tau le mafaufau o le tamaititi i aso o le la mafutaga ma le tama’ita’i, lea na ia tauto ai ina ua la faamavae i le malae vaalele, a uma lana aoga i Niu Sila, ona toe fo’i mai lea la te nonofo, peita’i ua ia le savali i lea folafolaga ina ua manumalo lona mafaufau e avea le tamaitai mai Niu Sila ia Lisa ma ana paaga. “Lasela, ia avea lenei mea ua tupu e fai ma lesona ia oe ..” o upu ia a Lisati ma aapa atu fusi le tama’ita’i, ona fa’asolosolo atu ai lava lea o lana faafeiloa’i i isi tagata o le aiga o Lasela, ae mulimuli lava i lona tina ma le uso o lona tina lea na la fasi to’aluaina si ona tina i le malae vaalele.

Ua salalau le tala i le motu tele o Savaii i le faaiuga a le nuu o Amouta sa faia i le isi Tuua o le nuu ma lona aiga, ina ua le usita’i i le finagalo o le nuu. Talu mai lea aso, sa vaaia le faaaloalogia o Lisati i totonu o lona nuu, aua o lea ua mae’a ona faaipoipo ia Lisa, ma ua avea laua o se ulugali’i faipisinisi i totonu o Amouta, ua fai fo’i i laua ma sulufaiga o le to’atele o le nuu i soo se mea e mana’omia ai le la fesoasoani i le itu tau tupe. O le faaiuga o le tatou tala, na mafua ona tutupu nei mea uma i le olaga o le tamaitai o Lasela ma lona aiga, ona o le pologa o lona loto i le alofa ia Lisati, peitai sa le taulau ona moomooga ina ua filifili Lisati e avea Lisa ma ana manamea. Ina ua mavae atu le Tuua matua o le nuu sa i ai, na filifilia ai loa e le aiga le ali’i o Lisati, e fai ma Sa’o o lona aiga, o ia fo’i o le tamali’i pito sili ona maualuga i totonu o Amouta.