Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na fa’aoloolo maau atu ai Lisati i le nuu ina ia ola le aiga o Lasela, ae afai e leai, fasioti laua ma Lisa e sui ai ola o Lasela ma lona aiga.]

 

E le i faigata ia Lasela ona ia iloa le leo o le tagata lea o lo o talanoa atu i le nuu, i tafatafa tonu lava o le vaega o le malae o lo o pulolou ai lo latou aiga i ietoga. E leai ma se isi o le nuu na toe pisa, o taulele’a ma matai laiti, ua na o le tutu ma tilotilo ia Lisati ma Lisa o lo o tootutuli i tafatafa tonu o le vaega o lo o pulolou ai le fanau a le toeaina matua o Sami, lea o lo o taatia i luma tonu lava o lana fanau ua oti, ina ua fana tutu’i e taulele’a o le nuu, o uso laiti ia o le tama o Lisati, e oo lava i tagata uma o le nuu sa laulau tutu mai i itu ala e lua ma matamata i le mea o lo o tupu, ua na o le laulau tutu ma vaavaai atu ia Lisati ma Lisa i le malae.

 

“Lo kakou guu,” o le leo pau lea a le tamaloa o Miki o lo o fai ma fofoga o le nuu i le faataunuuina o le finagalo ua tasi i ai le nuu atoa o Amouta. “E foliga mai ua i ai le kagaka ua magaku e faalavelave i le figagalo o le guu, ae o aso faapegei, o ai lava le kagaka e faalavelave i le figagalo o le nuu, e kafi faakasi aku ai, ae paga lea, o le lupe faalele legei a le kakou guu sa auiga aku i akuguu i fafo mo aoaoga, lea ua fo’i mai ma ua galue i galuega a le malo, ma ua faaeaiga ai lo kakou guu, o le mea lea, o le a se’i fesiligia se kofa o Kama makukua ma le Kuua o le kakou guu e uiga i legei makaupu.” O le saunoaga lea a le tulafale o Miki ma ia faatonuina loa isi matai ina ia latou toe fo’i atu i le aai i le maota o lo o faatali mai le Tuua o le nuu ma isi tamali’i, e logo i ai le mea ua tupu.

 

E le i leva ona fo’i atu tulafale e ta’u le poloa’i ae vaaia loa le fotua’i mai o le Tuua o le nuu, ma tamali’i uma sa fa’atali mai i le maota, e aga’i mai i le vaega tonu o lo o tupu ai le fa’alavelave, ma ua atili ai ona gatete tagata uma ma faapea ane i o latou loto, “kafefe poo le a le mea o le a oo ia Lisaki ma Lisa, o lea ua afio mai le Kuua o le guu, maukigoa lava ua ika le koeaiga ma le guu i le fa’alavelave o le vaega lea.” Na ona savali mai lava o le Tuua o le nuu, tu i luma o le malae, ona faapea atu lea ia Lisati, “Lisaki, malo koa, faafekai i le galuega ua e faia ua faaolaiga ai isi o lo o kokoe o le aiga lea, o oe o le lupe faalele a le guu sa auiga aku i aoaoga i fafo, lea ua e fo’i mai ma ua e fa’aeaiga lo kakou guu o Amouka e ala i lau pisigisi ua faia gei, akoa ai ma lau galuega ua e galue ai i totonu o le kakou malo, lo kakou guu, o le a lava le mea ua oo i ai le figagalo o le kakou guu, kaoko ai faapega, ae o le aso, ia ola le pagoka.” O upu ia o le saunoaga a le Tuua o le nuu na faalogoina ai le tau fai alalaga fiafia o tagata uma o le nuu i le fiafia ma le faafetai, ona o le galuega lelei sa faia e Lisati ma Lisa.