Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua faatonu ai e le Tuua o le nuu taulelea ma matai laiti ina ia faapotopoto atu i le malae a’o le i taina le itula e 4:00, e sauni ai mo le isi laasaga e tuuina atu faatatau i le aiga o Lasela.]

 

Ua faatumulia le malae i luma tonu o le maota o le Tuua o le nuu o Amouta i taulele’a ma matai laiti uma o le nuu, ina ua latou usitaia le faatonuga sa tuuina atu e le Tuua, ina ia faapotopoto atu a’o le i ta le itula e 4:00 e sauni ai mo le isi faatonuga e tuuina atu, pe afai e le usitaia e le aiga o Lasela le finagalo e pei ona tu tootoo ai le nuu, e tafi ese ai i latou mai totonu o eleele o Amouta. E le i manatu mamafa le toeaina o Sami ma lona aiga i le finagalo o le nuu, ona e i ai lona talitonuga e tatau foi ona vaai alofa atu le nuu, o ia o le isi Tuua o le nuu, o se tagata ma’i fo’i, ma, atonu lava e talia sa latou faatoesega e tuuina atu i ai.

 

Se i o tatou aga’i atu lava i le tamaititi o Lisati ma lona aiga fou lea ua tau amata. O le aso lea na tu tootoo ai le nuu i le aiga o Lasela, na pisi ai fo’i Lisati mo le la aso fiafia i le aso e sosoo ai, ma ua amata fo’i ona tumu tumu atu o la aiga i le fale e sauni ai mo le la faaipoipoga i le aso Toona’i e sosoo ai. “Sole, ua makua kumu lava le malae i le guu, e le iloa pe o le a le mea o le a kupu i si koeaiga o Sami ma loga aiga pe afai ae ta le 4:00 e le koe o ese ma le guu,” o le tala lea a le fafine o Melema, le uso o le teine o Lisati sa fai atu i le latou aiga, ao faapotopoto ai i luma o le fale talimalo ma matamata i se mea uiga ese o le a tula’i mai i lea aso.

 

“Ae aisea ua mafua ai oga faia e le guu lea faaiuga i le aiga o Lasela,?” o le fesili fia iloa lea a le tamaitai o Lisa, ae na faamatala i ai e le tina o Lisati le mafuaaga o le faaiuga a le nuu, ona ua fai soo le amio a Lasela ma lona aunty o le faaoolima i taito’alua o matai e aofia ai ma ia. “Aisea ua le vili ai leoleo ae ua fai faapenei lea faaiuga matuia,?” o le isi lea fesili a Lisa, ae na toe tali atu i ai le fafine, e faigata ona faafesootai leoleo leaga o mataupu faapenei e fitoitonu lava i le pulega a alii ma faipule o le nuu, o mea foi e mafai ona toe teuteu pe afai ae talanoa matai i se faaiuga talafeagai.

 

Na motu faafuase’i le talanoaga a Lisa ma le tina a Lisati ina ua faalogoina e le aiga fana ua pa pa mai, ona tau fai tulioso atu lea o le aiga i luma o le auala e fiailoa le mea ua tupu, ma le vaai atu, ua aga’i atu le solo faaniu tu a taulele’a ma matai o le nuu e aga’i atu i le fale o Lasela ma le latou aiga, e fai o naifi ma fana i luma o taulele’a, ae o isi fo’i i moli fagu ma laau, e savavali lava ma faapa pa fana a’o gutu e le malolo i le feei ma laulau vavale solo i upu mataga faasaga i le aiga o le toeaina o Sami, a’o le taimi lea ua i totonu uma o le fale talimalo le aiga o Sami, ua tau fai tootutuli uma ma fetagisi.