FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua tu ai le tootoo o le nuu i luma o le fale o Lasela ma ona matua, ma faatonu ia ta ane le 4:00 i le afiafi o le aso lea, ua tula’i ese ma le nuu, afai e leai o le a mu le foaga.]

 

A’o tu le tootoo o le nuu i fafo o le maota o le toeaina o Sami, o le taimi lea na taufetuli atu ai lana fanau ua fafagu mai le toeaina o lo o moe, ona toso mai lea o lana wheelchair i luma o le fale talimalo, ina ia faigofie ai ona fai atu sona manatu i le finagalo o le nuu lea ua faailoa atu. Na motu faafuase’i le lauga a le tulafale o lo o tu tootoo, o ia foi lea o le fofoga o le nuu ina ua vaai atu ua toso mai i luma o le maota le wheelchair a le tamaloa o Sami, ona toe faaauau lea o le lauga ina ua nofo lelei le toeaina ao tua atu o lana nofoa o lo o saofafa’i uma mai ai lona toalua ma lona aiga atoa.

 

“E le o koe i ai lava se isi faaiuga o kokoe i le finagalo o le kakou guu i lau afioga i le ali’i makua Sami, o le aso lava legei ua figagalo i ai le guu e kakau ai oga oukou kula’i ese ma eleele o Amouka, oga ua kele mea makaga ma le le maguia ua faia e lau fagau a’o lega lava e ke gofo e augoa ma se faukuaga e avaku i ai, o le a kakou koe fesilafa’i pe afai kou ke le usikaia le figagalo o le gu’u,” o upu faaiu ia o le lauga a le tulafale sa tu i le tootoo.

 

E tau lauga mai si toeaina o Sami ae vaai mai ua fuli atu tua o matai e toa 10 atoa ai ma taulele’a o le nuu e silia ma le to’a 20 na o mai e momoli le finagalo o le nuu i le latou aiga. E le o se aso lelei lea mo Sami ma lona aiga, aemaise ai lava le tamaitai o Lasela lea ua avea nei ma mafuaaga autu o le faaiuga a le nuu, ina ua faalua ona la fasia ma le uso Tomboy a lona tina le tina a Lisati, o le faletua o se tasi o matai o le nuu, atoa ai ma le faia o amioga e faalumaluma ai le nuu i fafo atu ma nofoaga e tumutumu ai tagata.

 

“O lea ua oukou faafofoga i le kofa mai kama o le guu, e leai foi se isi magaku e mafai oga koe faia i ai, pau la’u faukuaga si a’u fanau ma le kakou aiga, afai kou ke fia vaai mai pea ia ke a’u, saili se kaavale e kapega ese ai a kakou mea ma kala i lalo kakou fale magu o lea e lava gai ikula o lo o kokoe,” o upu ia a le toeaina i lona to’alua ma lana fanau, peitai sa faaloto tele atu i ai lona aiga e aua nei latou o ese, e lea mafai fo’i e le nuu ona fai se isi mea matuia e sili atu i a latou upu ua faailoa atu, aua o ia o le isi tuua matua o le nuu. Ua silia ma le lua itula talu ona maea le taimi na faailoa ai le finagalo o le nuu i le aiga o Sami, ae leai lava ma se gaioiga o maitauina e le nuu, ona manatu ai loa lea o le Tuua matua o lo o totoe i le nuu, ua tatau ona faapotopoto uma atu le aumaga ma matai laiti mo le faatinoina o le isi finagalo o le nuu pe afai e ta ane le itula e 4:00 i le afiafi e le i tula’i ese lava Sami ma lona aiga.

 

Comment Here