Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua maea ai ona faamavae uma le aiga ia Lisati, ma ua savali atu nei le tamaititi i totonu o le potu o lo o nonofo ai le pasese e faatali le taimi e o atu ai i le vaalele.]

 

Pei lava o lea faatoa alu ese atu Lisati mai le aiga i le ulua’i taimi na alu ai i Niu Sila mo lana aoga, i le vaaiga lea ua oo i ai le aiga i le po lea, e fai o le mafatia o le ulugalii i le misia o le tamaititi, ae oo lava foi i nai ona tei laiti e leai ma se isi e le’i tagi i lea po. Ua fo’i gugu le aiga i le fale ma loimata, ua le gagana le isi i le tasi, pau lagona o matua ua oo ane, tuai na oo i le fale ae se’i momoe e faagalogalo atu ai lagona misia ma le mafatia o le atalii ua tuuvaa ese atu, ae o Lisati i le taimi lea, sa le’i aveesea ona matua i lona mafaufau.

 

Ua vaavaai mai le tamaititi i le fe’ilafi atu o moli o le malae vaalele i Faleolo i le taimi na lele faatu sa’o ai i luga le Polenisia o le a lele ese atu ma Samoa, ona atili lea ona tagi le tamaititi i le misia o nai ona matua, ae i lona loto i le taimi lea, ua fia fo’i e faauma lana aoga ma se’i fai se mea lelei mo lona aiga. O le tagata lava na muamua tau i ai le vaai a le tamaititi ina ua taunuu i le malae vaalele i Aukilani, o le tamaitai o Lisa lea o lo o pito mai lava i luma o le laina umi a lona aiga ma uo na o atu e faatali lona taunuu atu. E ese ai lava le faataliga o Lisati mai le toatele o le pasese, e fai o pese na usu ane ae le’i misi mea pu’eata atoa ai ma pepa o lo o tusia ai upu faamalosi e faatatau i le tamaititi ma le ma’i o si ona tama.

 

“Malo le malaga manuia Son,” o upu faafeiloa’i ia a le aunty a le tamaititi o Lisati, le tuafafine o lona tama lea o lo o faamautu ai i Niu Sila, ona tau faasolosolo atu uma lea o le au faatali pasese e faafeiloa’i le tamaititi, ae mulimuli ai lava le tamaitai o Lisa. “Kafefe ailoga na e toe manatuaina a’u i le taimi na e taunuu ai i Samoa, a ea?” o le fesili ata lea a Lisa ma aapa atu ua fusi mai le tamaititi ma sogi atu i ona laugutu, sa faapea foi ona tali atu i ai Lisati i lona fusi mai o le tamaitai ma kisi atu i ai, ona la ofoofota’i ai lava lea mo se taimi umi ona o le misia o le mafutaga.

 

E lei toe i ai se isi mea na tuu i le mafaufau o Lisati ina ua taunuu i Niu Sila, sei vagana ai lona naunau loa e faauma lana aoga. O le tausaga lona lua na maua ai loa le avanoa o Lisati e faigaluega ai i se tasi o Ofisa a le malo o Niu Sila, lea e mafai ona latou faa faigaluegaina tamaiti aoga e maualuluga togi mo ni galuega faavaitaimi, e faatali ai le taimi e maea lelei ai le su’eina o faailoga a tamaiti, ma o le ofisa la lea ua galue ai nei Lisati, e maua ai se isi alagatupe e fesoasoani ai i lana aoga, ma o iina lea ua manatu Lisati o le a maua ai ma le avanoa e lafo ai ma se tupe i nai ona matua i Samoa o lo o tapua’i atu i lana aoga.