FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na valaau atu ai le tei laititi o Lisati i le tama, ma faasino Lasela lea ua savali mai i le isi itu o le malae vaalele.]

 

E leai ma se isi o le aiga e le’i tepa i le itu lea na fai atu ai le tei laititi o Lisati o lo o savali mai ai Lasela, na oo lava fo’i i le tamaititi i le aso lea, na toe tu lava ma tepa i tua ina ua ia faalogoina le si’u leo o si ona tei laititi e faatatau iua Lasela. Talofa, e ui i le matuitui o lagona maasiasi o lo o nofo ma Lasela, peitai e le’i mafai e ia lagona uma ona taomia lagona o le alofa moni i le tamaititi, o le mafuaaga lea o lona lotulotu atu i le malae vaalele na o ia, o le fia faamavae ma ofo atu lana meaalofa mo le tagata o lo o pele i lona loto.

 

Talu ai e le’i manatu le tamaititi o Lisati e i ai se isi o lona aiga e fai sana tala ia Lasela, o lea na ia manatu ai e savali e faafetaui ia te ia manu e le’i o o atu i le pito o lo o tumu tumu ai lona aiga aemaise nai ona matua. Na maligi loimata o le tamaititi ina ua ia vaaia Lasela o lo o savali atu ma se afifi i lona lima. “Toeititi lava a e tuai mai, ua oo i le taimi e tatau ai ona matou o i totonu i le vaega e faatali ai le aga’i atu i le va’alele, ae o le mea sili ua e sau,” o tala ia a Lisati ma tago atu ua fusi mai le tamaitai, a’o ia vaaia le maligi lemu ifo o ona loimata i ona foliga. “Se Lasela, se aua ete loto vaivai, se’i o’u alu e faauma la’u aoga ona ou toe sau ai lea, ae o lea ua ua maea na fofola atu se manatu o lo o ia te a’u e faatatau i le ta mafutaga, pau la’u tatalo, ia maua pea le ola ma le malosi ina ne’i motusia faafuase’i la tatou mafutaga i le oti.”

 

“Lisati, o la’u mealofa lea mo oe i lau aoga, aua ete tatalaina le meaalofa iinei, alu e tatala i luga o le vaalele, o la’u tatalo, ia manuia lau malaga ma lou toe fo’i atu i le aoga, tele pe itiiti logo mai.” o upu mulimuli ia a le tamaitai o Lasela i le tamaititi o Lisati, ona ia toe fusi lea o le tamaititi ma la faamavae loa. Na tu Lasela ma ona loimata a’o savali malie ese atu Lisati e toe fo’i atu i le itu o lo o faatali mai ai lona aiga, e aunoa ma se isi e emo se mata pe gagana i se upu, ae na o le sioa ma vaavaai i gaioiga uma a le toalua lea o lo o faia. Na ona taunuu atu lava o le tamaititi i luma o ona matua aemaise ae le latou aiga atoa, ona ia toe faatofa lea i ai ma savali loa aga’i i totonu o le potu e faatali ai le pasese. Na lagona e le tama o le tamaititi o Lisati lagona alofa o lo o i ai i lona atalii faatatau ia Lasela, ae i lona manatu faa matua, e le tatau ona faaauauina le mafutaga a le toalua lea, leaga o lea ua le faamaoni le tamaitai i lona atalii, pau le lagona o lo o i le tamaloa, ia manuia le aoga a lona atalii ma maua sona lumana’i lelei e tausi ai nai ona tei, pe afai ae mavae atu laua ma le tina o le aiga.

 

Comment Here