[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na pepese fiafia ai manu o le vao maoa ae molimau fetu i le lagi i le mafuaga a Lisati ma Lasela lea ua faatoa atoa i le la mafutaga ina ua maea le misa.]

E lei toe ano lava tagata o le nuu i le mea sa tupu, ae ua na o le foi i o latou aiga ma talie i faasalaga lea ua sauni le nuu e tuu atu i le fafine o Mekala, ona o le mea sese sa ia faia i lona fasi lea o le toalua o le matai o le nuu, ae na lilo i tagata ua avea le vevesi na tulai mai ma itu ua maua ai loa ma le avanoa o Lisati ma Lasela e mafuta ma feiloa’i ai, talu mai tausaga e tele o le la faigauo i totonu o le nuu, aemaise ai o tausaga e lua lea na tuua ai e le tamaititi le nuu ona o aoga i Niu Sila.

“Sole, sole, o ai lea e pisa mai tua i i,?” o le fesili fia iloa lea a le tama o Lisati lea faatoa fo’i mai i le piliaki, ina ua ia maua le tala e uiga i le mea sa tupu. “Papa, o a’u lea e i tua i i, o lea ma te talanoa ma Lasela,” o le tali lea a le tamaititi o Lisati ma savali mai i luma o le auala, a’o lona tama o lo o tu ma autilotilo aga’i i le latou fale, e foliga mai e i ai se mea o lo o manu’a ai lona loto. “Aisea ga vevesi ai lou kiga ma Mekala, a’o fea sa e i ai,?” o le fesili lea a le tamaloa i lona atalii, ma maua ai loa le avanoa o le tamaititi e faamatala atoa ai i lona tama le mea sa tupu, amata mai lava i le taimi o le taaloga Bingo, ma faasolo mai ai lava seia oo i le taimi na tupu ai le misa.

O le ‘ona o le tamaloa o Lomi na faigata ai ona televave lona ita, ae sa na o le luelue ulu ma faalogologo i le faamatalaga a lona atalii. “A’o ai le la e gofo mai i luga o le oga giu,?” o le fesili lea a Lomi ma faasaga atu i le isi itu o le latou fale lea o lo o saofa’i mai ai le tagata, “O Lasela le la ma te talanoa.” O le musu o le tamaloa e toe tulai mai se isi talanoaga i le va o lona atalii ma Lasela, na mafua ai ona ia faatonu lona atalii e fai ia Lasela e alu i le fale, ae alu atu loa o ia latou te momoe o lea ua totoeititi ao le isi aso fou.

O le po o le aso fou lea o le a malama, e toe fo’i atu ai Lisati i Niu Sila mo lana aoga, ina ua maea vaiaso e lua na faanoi ai ona o le ma’i a lona tama. Ua sauni le tamaititi e toe foi i lona aiga fou i Niu Sila o lo o nofo ai, ae o lona loto lea ua faavaeluatai i lona manatu ia Lasela, ona o lea ua feulua’i le alofa ma ua lagona foi e le tamaititi le moni o upu na talanoa atu ai le tamaitai ia te ia. Ua faasolosolo atu le aiga e faamavae ia Lisati i le malae vaalele, e o o foi i le faifeau ma isi tagata o le aulotu atoa ai ma le autalavou, sa gasolo atu uma e faamavae ia Lisati, peitai e maea loa le solo umi o le a savali le tamaititi i totonu o le potu e faatali ai le aga’i atu i le vaalele, ae valaau mai loa ma le tei laititi o Lisati, “Sati, vaai fo’i ia Lasela la le savali mai.”