FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na taumafai ai le isi matai tulafale o le nuu e faafilemu le vevesi.]

 

Ua amata ona taape filemu ese atu le au faitatala sa tumu tumu e fia iloa le ‘au o le paipa, ae o le tamaloa o Pefu, o lo o i ai pea o ia i totonu o le fale o le aiga o Lisati, ma o lea ua ia faatonuina le fafine o Nema e sili pe a alu e moe i le fale o le faifeau mo le po lea, se’i tau faato’afilemu le vevesi, ae tuu ai pea Lisati ma nai ona tei atonu toeititi fo’i mai le toeaina o lo o taalo piliaki ma ana uo i le isi pito nuu, ma o le tonu lena ua faia nei i lalo o le faatonuga a le tamaloa o Pefu. Na ona maea lava o le vevesi, ona toe savali lea o Lisati i luma o le auala e vaai poo i ai nisi o ana uo sa latou eva poo ua taape uma, ae na te’i le tamaititi ina ua oso atu i fafo o le fale o lo o nofonofo lelei mai ai lava Lasela e le’i alu i lona aiga.

 

“Suga, aisea ua e le alu ai,?” o le fesili lea a Lisati ma savali atu ua saofa’i i le oga niu lea e saofa’i mai ai Lasela. Ua le gagana le mafine i se upu se’i vagana ai le tagi masusu ona o le mea sa tupu.

 

“Vaai oe Sela, poo a nei mau mea o lo o tutupu mai, e le mafai ona aveesea lo’u mafaufau mai ia te oe, amata mai lava i ulua’i taimi o le ta mafutaga seia oo mai i lenei afiafi, e fafagu mai pea i o’u luma galuega lelei ma lou loto fesoasoani sa ofo mai mo a’u ma lo’u aiga, ae ua mafua fo’i ona tupu le vevesi o lou le faalogo i sa’u fautuaga, ana e usuta’i ma faalogo mai e le fasi e Mekala lo’u tina, laki ua ou vave mai semanu e tigaina lo’u tina ia te oulua ...”o upu ia a le tamaititi, ona motu faafuase’i lea o lana tala ina ua tagi, ae ua aapa atu Lasela ma fusi mai le tamaititi ma ia faatoese atu i ai e tusa o le mea sa tupu.

 

Talu mai lava le mafutaga a le toalua lea i aso a’o laiti, sa tulimata’i pea o la mafaufau i se taimi ma se aso e mafai ai ona tuu faatasia i laua o se aiga e tasi, peitai e foliga mai ua fesouaina a laua filifiliga ona o le nonofo valavala ai, o Lisati i Niu Sila i lana aoga a’o Lasela i Samoa, ma o lea fo’i ua maua tala ua nonofo ma le toeaina leoleopo. Ua ese lagona o le tamaititi i le taimi na pa’i atu ai lima o le tamaitai ma fusi o ia ma faatoese atu i le mea sa tupu, ona aapa ane fo’i lea o le tamaititi ma fusi atu Lasela i ona lima masomasoa, ma musu musu atu i le taliga o le tamaitai, “faamagalo mai so’u sese i lo ta va.”

 

Talofa e, sa lilo i manatu o le ulua’i taimi lea o le a feoota’i ai lagona o le alofa, aua o le talanoaga sa faia i luma o le fale, ua na o se talanoaga e faaleleia ai le vevesi na tula’i mai, ae na i’u ina faatatafa ai laau toto a si olomatua o Nema o lo o i luma o le paepae ma’a o le fale, ae alalaga ma pepese fiafia petu o le lagi, ina ua alo atu le alii aoga mai Niu Sila e tali toga o le au faamuli, ma ua le mafai ai ona taofiofi le suamalie o lagona o le alofa ua tele aso o faananau i ai le tausala.

Comment Here