[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua tali atu ai Lisati i fasaga a Lasela lea ua la’u atu e faatatau i le la mafutaga, a’o le’i tu’uva’a ese atu le tama i lana aoga i Niu Sila.]

“O ai ga fai aku ua ma gogofo ma se leoleopo,?” o le toe oso atu lea a Lasela i fika a Lisati sa fai atu i ai, “O kagaka lava o le kou aiga na o mai ma koe la’u mai kala e faakakau ia oe, ae o a’u ia ou te le’i iloa lava se mea o tupu, sa ou faapea o lo o sologa lelei mea uma i le ta mafuaga.”

Na faalologo laau o le vao ma manu felelei o lo o fai le Mago tele lea ma latou ofaga i upu uma o le taugaupu a Lasela ma le alii o Lisati, a’o pisi le afafine o le pulenuu ia Salai e lau numera o le Bingo a tina o le mafutaga a le Ekalesia i le afiafi lea. Na avea le faatimutimu o le po lea ma itu na leai ai ni tagata feoa’i, ae ua sasao ai lava faiga a le to’alua lea i le avea lea o lalo o le Mago ma la maea fusu. Laki e le o iloa e le tina o Lisati nei mau mea e tutupu, atonu ua na o le futi o le ulu o Lasela ma olo guku i lalo o le palapala. Fai aku ai fo’i.

Na fiu le tamaititi e toe faalogo se isi upu a Lasela ua le toe lagona se mea, sei vagana ai le masusu e foliga mai ua tagi o lo o taia i lana faalogo, atili au e fai lava si pogisa o le po, e faigata foi ona iloa atu e le isi foliga o le tasi. “Siaula, oi, a e kagi la o lea e alu le afiafi, o a’u ua ou fia alu e makamaka i le Bingo, ma le isi mea, ou ke musu i su’e a’u e lo’u kiga ae ke’i ua maua mai kaua ii oga pisa kele lea o le mea,” o le tala lea a Lisati na mafua ai ona toe oso mai le tamaitai ma le anoano o le mau tala le manuia. “Loga uiga ua iloa e lou aiga kala uma gei, a ea, ae aisea eke pepelo mai ai ma fai mai e lei iloa e le kou aiga kala e faakakau i le leoleopo,?” o le avaavau atu lea a Lasela i le tamaititi na mafua ai loa ona tu i luga Lisati ma savali ese mai i le nofoaga o lo o la i ai, ma aga’i atu loa i le fale o lo o fai ai le Bingo, ae tia’i ai na o Lasela i lalo o le Mago.

E savali fua le tamaititi ae o lona loto o lo o mafatia i le alofa i le tamaitai sa avea ma ana paaga mo le tele o aso, ae paga lea, e le o le Lasela lea sa la mafuta i aso a’o la laiti, aua o uiga o le tamaitai i aso a’o la laiti, o ia o se tagata e loto alofa ma agamalu, ae o suiga ua ia vaaia na ofo tele ai lona loto. “Sole, o fea sa e i ai o lea o le a uma le Bingo ao lega faakoa e aliali mai,?” o le fesili lea a Mako le tausoga o le tamaititi o Lisati na muta faafuase’i ai mafaufauga fai vavale o le tamaititi ae ua faafoliga lana ata ma tali atu, “sa fai fo’i siga savalivali i kokogu o le guu oga o lea fo’i o le a ou koe fo’i i le aoga.” Na umi se taimi o miomi-o ai lava Lisati i lana tupulaga i le nofoaga o lo o fai ai le Bingo, peitai e latalata loa o le a maea le taaloga Bingo ae tamoe atu loa le isi tamaititi o le aulotu ma valaau leotele atu ia Lisati, “Saki, fai mai Lasela pe mafai oga e alu aku.”